Jýrnalisterge arnalǵan «Úrker-2019» ulttyq syilyǵyna ótinim qabyldaý 20 maýsymda aiaqtalady, dep habarlaidy "Ult aqparat".
Buǵan deiin habarlaǵanymyzdai, syilyqqa ótinim 25 mamyrdan qabyldana bastaǵan edi. Ulttyq syilyq baspa, radio, internet-jýrnalistika salasyndaǵy úzdik jetistikteri úshin beriledi. Atalǵan syilyq óńirlerdegi mýltimedialyq jýrnalistikany damytýǵa yqpal etý, jýrnalistika mártebesin kóterý, kásibi standarttar men kriteriilerdi bekitý, qoǵamnyń azamattyq belsendiligin arttyrýǵa baǵyttalǵan.
Syilyqtyń quryltaishysy jáne uiymdastyrýshysy - QR Aqparat jáne qoǵamdyq damý ministrligi. Biyl ótinishter jyldyń úzdik fotografiiasy, jyldyń úzdik reportajy, jyldyń úzdik analitikalyq materialy, jyldyń úzdik jýrnalistik zertteýi, jyldyń úzdik suhbaty, Qazaqstan týraly jyldyń úzdik tanymdyq materialy, jyldyń úzdik radiostantsiiasy, jyldyń úzdik aqparattyq portaly, jyldyń úzdik gazeti, jyldyń úzdik jýrnaly, jyldyń úzdik new media-sy (telegram-kanal, áleýmettik jelilerdegi úzdik aqparattyq pablik) nominatsiialary boiynsha qabyldanady.
Úzdikterdi arnaiy qurylǵan komissiia aiqyndaidy. Onyń quramyna media salasynyń damýyna eleýli úles qosqan tanymal menedjerler, jýrnalister, qoǵam qairatkerleri enedi. Jeńimpazdarǵa 1 mln teńge jáne syilyqtyń arnaiy estelik músinshesi tabystalady.
Eske sala ketsek, baspa, radio jáne internet-jýrnalistika salasyndaǵy «Úrker» ulttyq syilyǵy 2017 jyldan beri taǵaiyndalyp keledi. Sol tusta Dáýren Abaev «osy syilyqtyń arqasynda jýrnalisterdiń biliktilik deńgeii joǵarylaitynyn» atap ótken edi.
