Dándi daqyldardan, ósimdik unynan jasalǵan un, usaq tartylǵan qospalar óndirisiniń kólemi biyl qańtar-naýryzda 881,4 myń tonnaǵa jetti.
Osylaisha, óndiris bir jylda 8,9%-ke artty. Alaida bul 2018-2019 jyldarǵa qaraǵanda az, dep jazady Sputnik Qazaqstan agenttigi Energyprom.kz saityna silteme jasap.
Óndiristiń ulǵaiýyna qaramastan, un baǵasy biyl naýryzǵa qarai bir jylda 15%-ke ósti. Sońǵy jyly un baǵasynyń aitarlyqtai ósýi aqpanda (2,1%) jáne naýryzda (birden 4,2%-ke) baiqaldy.
Biyl naýryzda qalalarda joǵary surypty unnyń ortasha bólshek saýda baǵasy kelisi úshin 279 teńgeni, birinshi surypty unnyń kelisine 191 teńgege jetti.
Qalalar arasynda naýryzda joǵary surypty bidai unyna eń joǵary baǵa Nur-Sultanda boldy. Astanalyqtar bir keli undy 343 teńgege satyp aldy. Sondai-aq, joǵary baǵa Atyraýda (327 teńge) jáne Almatyda (312 teńge) baiqaldy. Eń arzany – Pavlodarda (194 teńge), Oralda (209 teńge) jáne Semeide (212 teńge).
Sondai-aq, birinshi surypty bidai unynyń quny Aqtaý (257 teńge), Nur-Sultan (248 teńge) jáne Almatyda (236 teńge) eń qymbat boldy. Petropavlda (139 teńge), Aqtóbe (145 teńge) jáne Qaraǵandyda (148 teńge) eń arzan.
Energyprom.kz sarapshylary aýyl sharýashylyǵy ministrligi tapshylyqty boldyrmaý úshin 2022 jyldyń 16 sáýirinen bastap 15 maýsymǵa deiin un eksportyna shekteý engizgenin atap ótti.
