Almaty qalasyndaǵy 2017 jylǵy 28-shi Dúniejúzilik qysqy ýniversiada jarystaryna kórermender tarapynan joǵary suranys týyndap otyrǵanyna bailanysty, Halyqaralyq stýdenttik sport federatsiiasy (FISU) basshylyǵy jankúierler paidasy úshin uiymǵa sailap qoiylǵan kórermen oryndarynyń kóbisinen bas tartý týraly sheshim qabyldady.
Osyǵan deiin habarlanǵandai, halyqaralyq hattamaǵa sáikes tribýnalardaǵy oryndardyń bir bóligi stýdenttik oiyndarǵa qamqorlyq etip otyrǵan FISU uiymynyń ókilderi, sondai-aq, resmi delegatsiia músheleri, sportshylar, BAQ ókilderi úshin saqtap qoiylady. Satýǵa bolmaityn bul kvotanyń úlesi ártúrli jarystarda jalpy kórermender ornynyń 30%-ǵa deiinin quraidy. Qazirgi tańda FISU kvotasynyń 90%-ǵa deiingi úlesin erkin satylymǵa shyǵarý týraly ýaǵdalastyq jasasyldy. Jarystarǵa arnalǵan biletter, sonyń ishinde, mánerlep syrǵanaý jáne hokkei sekildi kópshilik arasynda úlken suranysqa ie bolyp otyrǵan saiystarǵa biletter búginnen bastap bilet satýmen ainalysatyn operatorlar júielerine (onlain jáne oflain) kezeń-kezeńimen satylymǵa túsedi.
Sondai-aq, úlken suranysqa bailanysty «Ticket Day» júiesi boiynsha jarystarǵa qosymsha biletterdi satý týraly sheshim qabyldanyp, qandai da bir is-sharalar aiasynda otyrýǵa arnalǵan oryndar sany tolyǵymen satylyp bolǵan soń, biletter ortalyqtandyrylǵan satylym júiesine shyǵarylady. «Ticket Day» degenimiz orynsyz satylatyn biletter, mundai biletterdiń sany sport nysandarynyń eń kóp syiymdylyǵy men qaýipsizdik talaptaryna sáikes shekteletin bolady.
Biletterdi kóptep satyp alyp, olardy qaita satýmen ainalysyp júrgen kásipkerlermen kúresý maqsatynda uiymdastyrýshylar bir adamǵa satylatyn biletter sanyn 8 danadan 5 danaǵa deiin azaityp otyr.
Búginnen bastap naqty bir jarystarǵa biletterdiń bar-joǵy týraly eń sońǵy aqparat naqty ýaqyt tártiptemesinde Ýniversiada saitynyń bas betinde jariialanatyn bolady.
Qazirgi tańda Ýniversiadaǵa satylǵan biletterdiń sany 184 myńdy qurady (jalpy kólemniń shamamen 80%-y). Bul Qazaqstanda ótkizilgen búkil is-sharalarǵa satylǵan biletter arasyndaǵy rekordtyq kórsetkish bolyp otyr. Osy tusta dál jarystar bastalar aldynda suranys aitarlyqtai ósip otyrady. Máselen, Ýniversiadanyń ashylý saltanatynan keiin 30 myńǵa tarta bilet birden satylyp ketken. Suranys áli de joǵary deńgeide bolyp otyrǵandyqtan, uiymdastyrýshylar satylymǵa túsetin qosymsha biletterdi satyp alýdy keiinge qaldyrmaýǵa keńes beredi.
"Ult aqparat"
