2017 jylǵy Qysqy ýniversiadanyń Atletter aýylynda sport delegatsiialaryn qabyldaý úshin obekterde sońǵy ázirlikter júrip jatyr.
«Búgingi kúni Qysqy stýdenttik oiyndarǵa qatysatyn 59 eldiń delegatsiia ókilderinen úsh myńnan asa ótinim qabyldadyq. Komandalar 24 qańtardan bastap keletindikten, dál sol kúni bizde Atletter aýylyn ashý saltanaty ótkiziledi. Qazirgi tańda obekter 90 paiyzǵa daiyn. Turǵyn úi bloktaryn jabdyqtaý, turmysta qoldanylatyn shaǵyn zattardy tehnikalyq ornatý jumystary júrgizilýde», - dedi «2017 jyly Almaty qalasynda 28-shi Dúniejúzilik qysqy ýniversiadany daiyndaý jáne ótkizý jónindegi direktsiianyń» Atletter aýylyn basqarý departamentiniń basshysy Sánim Sháripova.
Atletter aýylynda sportshylarmen qatar, Resei, Ýkraina, Ońtústik Koreia, Qytai, AQSh jáne taǵy da basqa elderden keletin júzge jýyq halyqaralyq erikti jaiǵasady. Bas josparǵa sáikes Atletter aýyly 5000 adamdy syidyra alady.
Piramida túrinde salynǵan ákimshilik ǵimaratta ornalasatyn Atletter aýylynyń ortalyq qaqpalary obektiń «júregi» sanalady. Munda akkreditteý ortalyǵy, kóshi-qon qyzmeti, qarjy departamenti, sporttyq aqparat ortalyǵy jáne bas aqparattyq ortalyq ornalasqan. Ýniversiada qatysýshylary aqparattyq ortalyqtarda jarystardyń kestesi jáne sporttyq obekterge deiin júretin avtobýs qozǵalysynyń kestesinen bastap, Atletter aýylynda jáne de qalada kún saiyn ótkiziletin mádeni baǵdarlamaǵa deiin búkil qajetti aqparatty ala alady.
Almatydaǵy Qysqy ýniversiada aiaqtalǵan soń Atletter aýyly Ýniversiada murasy retinde turǵyn úi keshenine ainalady.
Aita ketsek, 28-shi Búkilálemdik qysqy ýniversiada 2017 jyldyń 29 qańtarynan bastap 8 aqpany aralyǵynda Almatyda ótedi. Qysqy ýniversiada baǵdarlamasyna mánerlep syrǵanaý, short-trek, taý shańǵysy, snoýbord, biatlon, shańǵymen jarysý, shaibaly hokkei (áielder men erler arasyndaǵy), kerling, shańǵymen tramlinnen sekirý, shańǵy qossaiysy, konkimen júgirý sporty, fristail sekildi 12 sport túri kirgen. Jarystarǵa 2 myńǵa jýyq sportshy qatysady dep kútilýde. Ýniversiada ótkiziletin ýaqytta 3 myń erikti, onyń ishinde sheteldik eriktiler atsalysady.Stýdentter arasyndaǵy sport oiyndaryna 30 myńǵa jýyq otandyq jáne sheteldik týrist keledi dep kútilýde. Saiystardy álemniń 80 elindegi 1 mlrd. adam teledidar arqyly tamashalamaq.
