Aqparat jáne qoǵamdyq damý ministri Asqar Ýmarov balalar men kámeletke tolmaǵandardy býlling pen kiberbýllingten qorǵaý jónindegi zańnamaǵa qatysty óz pikirin bildirdi, dep habarlaidy "Ult aqparat".
«Birinshiden, bul túzetýlerdi qabyldaý - Qazaqstandaǵy sóz bostandyǵyn shekteý emes. Shyn máninde zań jobasyna usynylyp otyrǵan túzetýler bizdiń elimizdegi sóz bostandyǵyn eshbir jaǵdaida shektemeidi, kerisinshe, QR aýmaǵyndaǵy áleýmettik jeliler men messendjerler qyzmetin zańnamalyq retteýdi kózdeidi. Basqasha aitqanda, biz sheteldik kompaniialardyń da elimizde qyzmet etip otyrǵan kez kelgen kásipkerlik sýbektileri siiaqty QR zańdaryn saqtaýyn qamtamasyz etkimiz keledi. Zańdarda tiisti baptar bolmaǵandyqtan, Meta, Telegram jáne t.b. sandyq alpaýyttar fizikalyq turǵydan Qazaqstan territoriiasynda bolmaǵandyqtan, biz olardan zańdarymyzdy saqtaýdy talap ete almaimyz. Zańdy ókildi taǵaiyndaý osy jaǵdaidy túzetýge múmkindik beredi», - dep jazdy Asqar Ýmarov Facebook paraqshasynda.
Ministrlik sońǵy jyldary halyqaralyq áleýmettik jelilerdiń ielerimen belsendi yntymaqtastyq ornatyp jatyr. «VKontakte», «Odnoklassniki», «Mail.ru», «Livejournal», «Facebook», «Instagram», «Tik tok», «Linkedin», «Telegram» messendjerleri bul bastamany quptady jáne osy normalardy oryndaýǵa kelisim berdi.
«Qazirgi ýaqytta sheteldik áleýmettik jeliler zańdy ókildi anyqtaý jáne taǵaiyndaý boiynsha jumys júrgizýde.
Bul túzetýler qarapaiym paidalanýshylarǵa eshqandai áser etpeidi, óitkeni zańsyz materialdardy taratýǵa jaýapkershilik qoldanystaǵy zańnamada qarastyrylǵan, olar ózgerissiz qalady. Ekinshiden, 24 saǵat ishinde zańsyz kontentti joiý talaptary. Belgili bolǵandai, ákimshilikteri eshqandai jaýapkershilikke tartylmaityndyqtan jabyq toptar men qaýymdastyqtar jeke paraqshalarynda jeke tulǵalardyń sońyna túsý, qýdalaý, qorlaý, jeke basqa tiisý faktilerin toqtatpai otyr. Olarmen bailanys ornatyp, aqylǵa shaqyrý áreketteri kóp jaǵdaida nátije bermeidi. Bul jaǵdaidy sheshýdiń jalǵyz ári tiimdi ádisi - áleýmettik jelilerdiń ózderine júginý. Aqparatty 24 saǵattan artyq saqtaý, siz túsingendei, málimettiń ózektiligin joǵaltýyna nemese ziiandy saldarǵa ákelýi múmkin», - deidi ministr.
Onyń aitýynsha, 24 saǵat ishinde áleýmettik jelilerdegi kontentti joiýdy/buǵattaýdy talap etetin zańdar birqatar damyǵan elde bar. Mysaly, Germaniiada 2017 jyldan bastap «Áleýmettik jeliler paidalanýshylarynyń quqyqtaryn qorǵaý týraly» Zań qoldanysta.
«Úshinshiden, monitoring pen statistika. Búgingi kúni Qazaqstan Respýblikasynyń aýmaǵynda kiberbýlling faktilerin aiqyndaý jáne tirkeý tetigi zańnamalyq turǵydan áli rettelmegendikten tikelei statistika joq. Alaida, Qazaqstan Respýblikasy zańnamasynyń talaptaryn saqtaýdy baqylaý sheńberinde Ministrlik turaqty túrde buqaralyq aqparat quraldarynyń, onyń ishinde Internet jelisiniń ónimderine monitoring jasaidy. Jalpy, 2021 jyly internet-resýrstardyń menshik ieleri men ákimshilikteriniń zań buzýshylyqtaryn joiý týraly ýákiletti organnyń usynymdary boiynsha shamamen 222 453 quqyqqa qarsy materialdardy joiý boiynsha sharalar qabyldandy. Budan basqa, 2021 jyly «Bailanys týraly» zańda kózdelgen tártippen ýákiletti organ Qazaqstan Respýblikasynyń aýmaǵyndaǵy paidalanýshylar úshin kiberbýllingke qatysy bar 10 578-den astam materialdyń taralýyn shektedi. Jalpy, usynylyp otyrǵan jańa normalar aiasynda Ministrlikke áleýmettik jeliler men messendjerlerdiń erkin qyzmetine kedergi keltiretin jáne pikir bildirý bostandyǵyn shekteitin quzyret berilmeitinin atap ótkim keledi», - dep túiindedi Ýmarov.
