19 shilde kúni oblys máslihaty Ulytaý oblysynyń 2022-2024 jyldarǵa arnalǵan biýdjetin qabyldady. Osy oraida biýdjet qarajaty oblys aýmaǵyndaǵy áleýmettik nysandardyń jáne infraqurylym jelileriniń qurylysyn júrgizýge baǵyttalatyn bolady, dep habarlaidy QazAqparat.
«Oblys biýdjeti Qaraǵandy oblysynyń biýdjetin bólý jáne aýdandar (qalalar) biýdjetterinen beriletin transfertter esebinen qalyptastyryldy. Qaraǵandy oblysynyń 610 mlrd 161,3 mln teńgeni quraityn biýdjetin bólý kezinde Ulytaý oblysynyń biýdjetine túsimder úlesi 17 paiyzdy nemese 103,5 mlrd teńgeni, al shyǵystar úlesi 15,6 paiyzdy nemese 95,3 mlrd teńgeni qurady. Oblys aýmaǵynda «Qazaqmys» kompaniialar tobynyń 9 kásipornyn qaita tirkeýge bailanysty biýdjet kirisine qosymsha taǵy 8,2 mlrd teńge túsedi. Bul oblystyń jańadan qurylý satysynda biýdjet úshin erekshe mańyzǵa ie», - delingen Ulytaý oblysy ákimdigi baspasóz qyzmetiniń málimetinde.
2022 jylǵa arnalǵan oblys biýdjetiniń kiris bóligi qosymsha túsimdermen birge 29,8 mlrd teńgeni qurady. Aýdandar men qalalardan túsetin transfertter 13,8 mlrd teńgege jetti. Osy jyl biýdjetiniń barlyq túsimderi 43,7 mlrd teńge boldy (nysanaly transferttersiz jáne sýbventsiialarsyz).
«Aldaǵy biýdjetti naqtylaý kezinde qosymsha taǵy 83 mlrd teńge kózdeletin bolady. Onyń ishinde 23,5 mlrd teńge respýblikalyq biýdjetten sýbventsiia, 33,7 mlrd teńge nysanaly transfert, 10,7 mlrd teńge óńirlerge transfert, asyra oryndaý esebinen - 15 mlrd teńge. Biýdjet shyǵystarynyń negizgi úlesi áleýmettik salaǵa tiesili. Bul salaǵa jalpy shyǵystardyń 54 paiyzy (16,2 mlrd teńge), turǵyn úi-kommýnaldyq sharýashylyǵy, jolaýshylar kóligi jáne avtomobil joldaryna – 14 paiyz, aýyl sharýashylǵy jáne veterinariiaǵa 3 paiyz baǵyttalady», - dep naqtylady baspasóz qyzmeti.
Oblystyq biýdjettiń shyǵystary 30,8 mlrd teńge kóleminde bekitildi. Bul qarajattyń 82,8 paiyzy aǵymdaǵy shyǵystarǵa (birinshi kezektegi shyǵystar - jalaqy, stipendiialar, memlekettik mekemelerdi, mektepterdi, mádeniet, densaýlyq saqtaý obektilerin, kolledjderdi jáne t. b. ustaýǵa), 14,5 paiyzy túrli jobalardy iske asyrýǵa baǵyttalatyn bolady.
Osy jyldyń basynan bastap Qaraǵandy oblysynyń biýdjetinen bastalǵan jobalarǵa jumsalatyn shyǵyndar Ulytaý oblysynyń biýdjetinde bekitilgenin atap ótý kerek. Bul – mektepterdi pánder boiynsha mýltimediialyq jáne interaktivti kabinettermen jabdyqtaý, Ulytaý aýdanynyń Sarysý, Borseńgir aýyldarynyń 2 mektebin kúrdeli jóndeý, Jezqazǵan qalasynyń onkologiialyq ortalyǵyn jóndeý, oblystyq mańyzy bar avtomobil joldaryn ortasha jóndeý, qalalar men aýdandardyń avtomobil joldaryn ortasha jóndeý, Jezqazǵan qalasynyń tazartý qurylystaryn qaita jańartý, Jańaarqa kentiniń negizgi sý tartqyshyn qaita jańartý syndy iri shyǵystar.
