Ulytaý oblysynda asyrap alǵan balalaryn bes jyl boiy sharýashylyq fermada jumys kúshi retinde paidalanǵan ógei ana qamaýǵa alyndy, dep habarlaidy "Ult aqparat".
Bul týraly Qazaqstandaǵy bala quqyqtary boiynsha ýákil Dinara Zákieva Instagram paraqshasynda málimdedi.
“Keshe atqarylǵan jumys kezinde Ulytaý oblysynda balalardy qul qylǵan áiel ustalyp, tergeý izoliatoryna qamaldy”, – dep jazdy ombýdsmen.
Dinara Zákieva aqpannyń basynda oblystyq prokýratýra men qamqorshy ókilderden quralǵan mobildik top bir otbasynyń úsh balasyn – bir qyz ben eki uldy tapqanyn aitqan edi. Olardy ógei ana balalar úiinen 2018 jyly asyrap alǵan. Ol kezde balalar 14, 12, 8 jasar bolǵan.
Úlkenderine qaladan 20 shaqyrym jerdegi fermada mal baqtyrǵan. Ombýdsmenniń sózinshe, komissiia músheleri fermaǵa kelip, balalardyń qandai jaǵdaida ómir súrip jatqanyn kórip shoshyǵan. Olardyń denesi kógerip, tilingen, azyp-tozyp, sharshaǵan, ash, kóz janary solǵan, kir-qojalaq, kiimderi jyrtyq.
Tekserý barysynda ulytaýlyqtyń 3 bala úshin járdemaqy alyp kelgeni de anyqtaldy.
"Balalardyń úlkeni – qyz, kolledjdi támamdaǵan, alaida is júzinde sabaqqa múlde barmaǵan. Ortanshy ul kolledjde "oqidy". Quqyq qorǵaý organdary bilim mekemesin tekserse, ata-anasy únemi balalardyń aýyrǵany týraly anyqtama berip otyrǵan eken. Qamqorshy qyzdy jumys istemeseń, ne shaǵymdansań, baýyrlaryńdy kórmeisiń dep qorqytqan", – dep jazdy Zákieva.
Bul tekserýge Ulytaý oblysy ákimi Berik Ábdiǵaliuly, prokýratýra, IIM atsalysqan. Is barysynda qamqorshynyń jaqynda taǵy da "patronatqa alýǵa bolatyn basqa da balalar bar ma?" dep surastyrǵany anyqtaldy.
Bala quqyqtary jónindegi ýákil qazir IIM, Prokýratýra men basqa da memlekettik organdar birlesip búkil el boiynsha pilottyq rejimde jumys isteitin mobildi toptar qurylǵanyn málimdedi.
