Sýret: gov.kz
Olar memlekettik satyp alýlarda zańbuzyshylyqtarǵa jol bergen. Laýazymdy tulǵalar 3,7 mlrd teńgege zańsyz memlekettik satyp alý ótkizbek bolǵan. Bas prokýratýra 12 memlekettik satyp alýdyń kúshin joiǵan.
Vedomstvo aqparaty boiynsha, bul zańsyz satyp alýlarda jergilikti atqarýshy organdar konkýrstardy jariialaý kezinde tiisti saraptamalar júrgizbegen, jobalyq-smetalyq qujattamalar bolmaǵan jáne áleýetti jetkizýshilerdiń jaǵdaiyn nasharlatatyn talaptar kózdegen.
Mysaly Jezqazǵan qalasynyń ekonomika jáne qarjy bólimi 1,9 mlrd teńgege avtomobil joldaryn kútip ustaýǵa memlekettik satyp alý jariialaǵan. Tapsyrys berýshi konkýrstyq qujattamada zańda kózdelmegen biliktilik talaptaryn negizsiz qoiǵan. Sonymen qatar tapsyrys berýshi biýdjet zańnamasynyń talaptaryn buza otyryp, 3 jyl merzimge qala joldaryn kútip ustaý týraly kelisimshart jasasýdy josparlaǵan.
Taǵy bir jaǵdaida Ulytaý oblysy Densaýlyq saqtaý basqarmasynyń Oblystyq psihikalyq densaýlyq ortalyǵy naýqastardy tamaqtandyrý qyzmetin satyp alý kezinde qarjyny 17,2 mln teńgege negizsiz joǵarylatqan.
Prokýrorlardyń narazylyǵymen zańsyz memlekettik satyp alýlar joiylyp, 9 laýazymdy tulǵa tártiptik, 17-si ákimshilik jaýapkershilikke tartylǵan.
