QR Premer-Ministriniń orynbasary Berdibek Saparbaev Qaraǵandy oblysynyń Ulytaý aýdanyna jumys sapary barysynda Alasha han, Joshy han kesenelerin, sondai-aq Altyn shoqy taýynda ornalasqan Aqsaq Temirdiń tas taqtasyn tamashalady, dep habarlaidy "Ult aqparat".
Vitse-premer Prezidenttiń Ulytaý aýdanyn damytý týraly tapsyrmasyn júzege asyrý jónindegi jumys josparymen tanysty, dep xabarlaidy QazAqparat tilshisi.
Esterińizge sala keteiik, Ulytaý halyqaralyq deńgeidegi etnografiialyq týrizmniń ortalyǵyna ainalýy tiis. Bul týraly Qasym-Jomart Toqaev «Ulytaý - 2019» halyqaralyq týristik forýmynda aitty.
«Týrizmdi damytý úshin Mádeniet jáne sport ministrligi memlekettik baǵdarlama ázirleýde. Ol Altyn Ordanyń 750 jyldyǵyn merekeleýge arnalǵan kóptegen týristik is-sharalar ótkizýdi kózdeidi. Qazirgi ýaqytta basty mindet — arnaiy týristik tujyrymdamany ázirleý. Ulytaýǵa keletin týrister aǵymyn ulǵaitý úshin barlyq jaǵdai jasaý kerek. Bul baǵytta jumystar júrgizilýde. Týristerdi tartý maqsatynda basqa da memlekettik baǵdarlamalar qabyldanýda. Atap aitqanda, jańa jylǵa deiin biz Ulytaý aýdanynda jáne jalpy Qaraǵandy oblysy boiynsha týristik keshenderdi damytý boiynsha arnaiy jobany qabyldaityn bolamyz», - dedi QR Mádeniet jáne sport vitse-ministri Nurǵisa Dáýeshov.
Berdibek Saparbaev, sondai-aq, aýdan ortalyǵyndaǵy týristik sapar-ortalyq qurylysynyń barysymen tanysty. Jospar boiynsha munda týristerge arnalǵan 15 oryndyq qonaq úi úlgisindegi jataqhana, murajai, 2 konferents-zal, ashana bolady. Premer-ministrdiń orynbasaryna sondai-aq óńirdiń tarihi-mádeni oryndary boiynsha týristik baǵyttar, tarihi eskertkishterdi qalpyna keltirý jumystary, buryn ótkizilgen týristik is-sharalar usynyldy.
Berdibek Saparbaev Ulytaý aýdanynyń ólketaný murajaiynyń qurylysymen tanysty. Joba boiynsha ǵimarat 2 qabattan turady, onyń alańy 830 sharshy metr. Qazir negizgi qurylys jumystary aiaqtalýda, qazandyq ornatý, ishki jáne syrtqy óńdeý jumystary júrip jatyr.
Vitse-premer mádeniet jáne sport ministrligine, oblys jáne aýdan ákimdigine sapar ortalyǵy men murajaidyń jumysyn tiimdi paidalaný jáne uiymdastyrý, jergilikti turǵyndardy qurylys-montaj jumystaryna tartý jóninde usynystar daiyndaýdy tapsyrdy.
Berdibek Saparbaev, sondai-aq, aýdandyq emhanada boldy. Kelesi jyly onyń janynda aýdandyq ortalyq aýrýhananyń qurylysy bastalady. Búgingi kúni qurylys úshin jer telimi bólinip, qarajat qarastyrylǵan. Aýdany 2000 sharshy metr bolatyn aýrýhananyń 3 qabatty ǵimaratynyń qurylysy kelesi jyly bastalyp, 2021 jyly aiaqtalýy tiis.
