Aitýly aqyn, Qazaqstannyń eńbek sińirgen qairatkeri Ulyqbek Esdáýletti mereitoiymen quttyqtaýǵa shyǵystyń shyǵarmashylyq intelligentsiiasy, oqyrmandar men qoǵam ókilderi túgel jinaldy. Bul merekelik shara oblys ákimdiginiń qoldaýymen ótti, dep habarlaidy QazAqparat.
Óskemendegi A.Pýshkin atyndaǵy oblystyq kitaphanada Ulyqbek Esdáýletpen kezdesý ótti. Onda kelýshiler Qazaqstan Jazýshylar odaǵynyń tóraǵasy, «Qurmet» ordeniniń iegeri, «Qazaqstannyń eńbek sińirgen qairatkeri» Ulyqbek Esdáýlettiń shyǵarmashylyǵynan syr shertetin kitap kórmesin tamashalady. Kórmege aqynnyń «Juldyz jaryǵy», «Altaidyń altyn tamyry», «Ulystyń uly kúni», «Aq kerýen», «Jaratylys», «Jýrektegi jarylystar», «Zaman-ai», «Kiiz kitap», «Qara pima» jáne «Yntyq zar» atty kitaptary qoiyldy.
Kezdesýdi Qazaqstan Jazýshylar odaǵy oblystyq filialynyń direktory, belgili qalamger Álibek Qańtarbaev júrgizip otyrdy. Ol mereitoi iesiniń ómir jolyna, shyǵarmashylyǵyna toqtalyp ótti. Budan soń jas aqyndar men ziialy qaýym aqynnyń óleńderin mánerlep oqyp, antiiadrolyq qozǵalystyń ánuranyna ainalǵan «Zaman-ai» ánin birge shyrqady. Basqosý barysynda U. Esdáýlet Qazaqstan Jazýshylar odaǵyndaǵy jumys barysy men bolashaqtaǵy shyǵarmashylyq josparlarymen bólisti.
Kezdesýde aqynǵa kútpegen tosyn syi retinde Qazaqstannyń halyq ártisi Roza Rymbaevanyń beinequttyqtaýy kórsetildi. Beinequttyqtaýda halyq ártisi U. Esdáýlettiń «Nevada-Semei» halyqaralyq antiiadrolyq qozǵalysyna qosqan úlesi zor ekenin atap ótti.
Kezdesý sońy oblystyq drama teatrda ótken «Altyn uiam – Altaiym» atty shyǵarmashylyq keshke ulǵasty. Saltanatty sharaǵa qatysqan oblys ákiminiń orynbasary Ásem Núsipova jyly lebizin arnap, aqynnyń óńirimizdegi jáne elimizdegi mádeni muranyń damýyna qosyp jatqan úlesi zor ekenin atap ótti. Sondai-aq, oblys ákimi Danial Ahmetovtiń quttyqtaýyn jetkizdi.
Shyǵarmashylyq keshti tamashalaýǵa jiylǵan kórermen qaýymnyń nazaryna talantty jerlesteriniń ómirinen syr shertetin beinesiýjet usynyldy. Budan soń Shyǵys Qazaqstandaǵy tanymal ánshiler men vokaldyq toptar Ulyqbek Esdáýlettiń ánderin oryndap, kórermen qoshemetine bólendi. Al mereitoi iesiniń ómirdegi hám shyǵarmashylyqtaǵy inisi, aqyn, Qazaqstan Jazýshylar odaǵy basqarmasy tóraǵasynyń birinshi orynbasary Aqberen Elgezek Ulyqbek Esdáýlettiń kóptegen qazaqstandyq qairatkerlerge úlgi ekenin atap ótti.
– Ol Qazaqstan Jazýshylar odaǵyna basshylyqqa kelmei turyp-aq, poeziianyń generalyna ainalyp úlgerdi. Poeziiada ustaz bolmaidy deidi. Alaida, ol bizdiń baǵyt berer baǵdarshamamyz siiaqty. Qazir biz Ulyqbek Esdáýlettei bolýǵa talpynamyz, - dedi Aqberen Elgezek.
Saltanatty shara barysynda mereitoi iesin oblystyq mádeniet, muraǵattar jáne qujattama basqarmasynyń basshysy Azamat Muhamedchinov, oblystyq sport, mádeniet qyzmetkerleri kásipodaǵynyń tóraǵasy Túsiphan Túsipbekova, aitýly qazaqstandyq aqyn Tynyshtyqbek Ábdikákimuly men elimizdiń mádeniet qairatkeri Aimuhanbet Beisembekov, kásipker ári metsenat Qairat Mýsin quttyqtap, aq tilekterin aitty. Artynsha Shyǵys Qazaqstannyń kásipkerleri birlesip, mereitoi iesine temir tulpar mingizdi.
