Elbasynyń «Uly dalanyń jeti qyry» maqalasynda tarihi sanany jańǵyrtýdyń negizgi basymdyqtary kórsetilgen. Búginde elimiz boiynsha osy igi bastamalardy júzege asyrý jumystary qarqyndy júrgizilýde. Bul rette, Elbasynyń senimdi tiregi retinde «Nur Otan» partiiasy da belsendi áreket etip, naqty isterdi qolǵa aldy. Atap aitqanda, partiia jas aqyn-jazýshylar arasynda «Uly dala» respýblikalyq shyǵarmashylyq baiqaýyn ótkizbek. Bul jóninde búgin partiia Tóraǵasynyń Birinshi orynbasary Máýlen Áshimbaev Ortalyq kommýnikatsiialar qyzmetinde ótken arnaiy brifingte málimdedi.
Atalǵan is-sharaǵa «Nur Otan» partiiasy Tóraǵasynyń Birinshi orynbasarymen birge belgili jazýshy, dramatýrg, qoǵam qairatkeri Tólen Ábdik, pýblitsist, Parlament Májilisiniń depýtaty Saýytbek Abdrahmanov jáne Qazaqstan Jazýshylar odaǵynyń sekretariat múshesi Nesipbek Aituly qatysty.
Alǵash bolyp sóz alǵan «Nur Otan» partiiasy Tóraǵasynyń Birinshi orynbasary Elbasy maqalasynyń máni men mańyzyna toqtalyp ótti. Ol bul maqalanyń ult tarihyn tanýdyń jańa kezeńin bastap bergenin jáne bizdiń álemdik órkeniet pen jahandyq damýǵa qosqan úlesimizdi qaitadan zerdelep, dúniejúzine jańasha dáripteýge úndeitinin aitty.
Sonymen qatar Máýlen Áshimbaev Memleket basshysy óz maqalasynda tarihi sanany jańǵyrtýdyń negizgi basymdyqtaryn aiqyndap bergenin jáne olardy júzege asyrýǵa «Nur Otan» partiiasynyń da belsendi qatysatynyna nazar aýdaryp, «Uly dala» shyǵarmashylyq baiqaýynyń bastalǵanyn jariialady.
– Bul baiqaý Elbasymyzdyń «Bolashaqqa baǵdar: rýhani jańǵyrý» jáne ótken aptada jariialanǵan «Uly dalanyń jeti qyry» atty baǵdarlamalyq maqalalarynda aitylǵan ideialar men qundylyqtardy dáripteýge baǵyttalǵan qoǵamdyq is-shara. «Uly dalanyń jeti qyry» atty maqala jariialanǵaly beri elimizde aýqymdy talqylaýlar ótýde. Bul maqala elimizdiń rýhani ómirindegi eleýli oqiǵa retinde qabyldanyp, sol salaǵa tyń serpin berdi. Sondyqtan maqalada aitylǵan basymdyqtar tarihi sanamyzdy jańǵyrtýǵa mol múmkindik beretin mańyzdy qadam, – dedi Máýlen Áshimbaev.
Sondai-aq partiia Tóraǵasynyń Birinshi orynbasary tarihi sanany jańǵyrtý – ulttyq sanany qalyptastyrýdyń negizgi sharttarynyń biri ekenine nazar aýdardy.
– Elbasynyń maqalasy tarihi, ulttyq sanamyzdy jańǵyrtyp, táýelsizdigimiz ben memlekettigimizdi odan ári kúsheitýge baǵyttalǵan úlken eńbek. Osy basymdyqtardy júzege asyrýǵa úkimettik emes uiymdar jáne saiasi partiialarmen birge ziialy qaýym ókilderi de belsene qatysqany abzal. Sondyqtan arnaiy baiqaý jariialap, qoǵamymyzdyń rýhani jańǵyrýyna áser etetin eńbekterdi jáne tarihymyzdaǵy uly tulǵalardyń ónegeli ómirin nasihattaityn shyǵarmalardy qoldap, jańa jumystardyń jazylýyna ózimizdiń úlesimizdi qosýdy kózdep otyrmyz. Bul baiqaýdyń formaty men mańyzyn Jazýshylar odaǵymen pysyqtap, aldyn ala talqyladyq. Aldaǵy ýaqytta jas qalamgerlerimiz osy baiqaý arqyly Elbasynyń maqalasynda aitylǵan qundylyqtar men ideialardy dáripteýge jáne olardy júzege asyrýǵa óz úlesterin qosady dep senemiz, – dedi Máýlen Áshimbaev.
Baiqaýdyń basty maqsaty – rýhani jańǵyrý ideialary men qundylyqtaryn dáripteitin qazirgi zamanǵy qazaqstandyq ádebietti damytý jáne soǵan qoldaý kórsetý. Sondai-aq óz shyǵarmalarynda elimizdiń rýhani jańǵyrýy men damýyn sýretteitin, qazirgi zamanǵy shyndyqty túsinýge jáne qazaqstandyqtardyń dúnietanymyn qalyptastyrýǵa yqpal etetin talantty jas ádebietshilerdi anyqtap, olardyń eńbegine laiyqty baǵa berý de kózdelip otyr.
Baiqaýǵa 18 ben 40 jas aralyǵyndaǵy qalamgerler qatysa alady. Qatysýshylardyń jumystary 2018 jyldyń 28 qarashasy men 2019 jyldyń 15 qańtary aralyǵynda qabyldanady. Nátijesinde «Proza», «Poeziia», «Dramatýrgiia, kórkem filmder men teleserial stsenarii», «Pýblitsistika» jáne «Balalarǵa arnalǵan shyǵarma» siiaqty bes birdei atalym boiynsha jeńimpazdar men júldegerler anyqtalmaq. Ár atalym boiynsha jeńimpaz ben ekinshi jáne úshinshi oryn alǵan qatysýshyǵa qomaqty qarjylai syilyq taǵaiyndalǵan. Naqty aitqanda, ár atalymnyń jeńimpazyna – 1,5 million, 2-oryn iegerlerine – 750 myń, al 3-oryn alǵan qatysýshylarǵa 500 myń teńgeden beriledi.
Jalpy Memleket basshysynyń tapsyrmasymen «Nur Otan» partiiasy qashanda ziialy qaýymǵa, aqyn-jazýshylarǵa, mádeniet pen óner salasynda ter tógip júrgen barsha azamattarǵa udaiy qoldaý kórsetip kele jatqany belgili. Ótken qazan aiynda osy baǵyttaǵy jumystardy odan ári jandandyrý maqsatynda partiia men Qazaqstan Jazýshylar odaǵy ózara yntymaqtastyq týraly memorandýmǵa qol qoiyp, aldaǵy jumystyń basym baǵyttary aiqyndap aldy. Sonyń negizinde partiia aqyn-jazýshylardy qoldaý maqsatynda tórt birdei joba usynǵan bolatyn. Iaǵni partiia jas aqyn-jazýshylarymyzdy qoldaý, olardy yntalandyrý maqsatynda «Rýhani jańǵyrý» baǵdarlamasy aiasynda arnaiy baiqaý ótkizýge, osy baǵytta Jazýshylar Odaǵymen birlesip «Astana» telearnasynan kórsetiletin arnaiy telebaǵdarlama daiyndaýǵa, qazirgi zamanǵy tehnologiialardyń kómegimen YouTube-te arnaiy kanal ashyp, rýhani jańǵyrýdyń qundylyqtaryn nasihattaýǵa jáne partiialyq jobalar aiasynda jańǵyrtylǵan elimizdegi kitaphanalarda aqyn-jazýshylarmen kezdesýler ótkizetin arnaiy klýbtar qurýǵa múddeli ekenin bildirdi. «Uly dala» shyǵarmashylyq baiqaýy sol memorandýmdy iske asyrý aiasynda qolǵa alynyp otyrǵan igi bastamalardyń biri.
