Búgin «Uly Dala Eline saiahat» jobasynyń «Saryarqa» baǵyty boiynsha tórtinshi ekspeditsiiasy bastaldy, dep xabarlaidy QazAqparat tilshisi.
16 kúnniń ishinde ekspeditsiia músheleri Aqmola, Pavlodar, Qaraǵandy men Soltústik Qazaqstannyń eń qyzyqty jerlerin aralap shyqpaqshy. Joodyń jalpy uzyndyǵy - 4595 shaqyrym. Ekspeditsiianyń quramynda saiahatshylar, telejýrnalister, sheteldik jáne qazaqstandyq trevel-blogerler, atap aitsaq - reseilik trevel-bloger Elena Hachina men qazaqstandyq saiahatshy-bloger Ulan Álimbek bar.
"Qatysýshylar Astana qalasynan Aqmola oblysy Ereimentaý aýdany men Qaraǵandy oblysy Osakarov aýdany aýmaǵynda ornalasqan «Buirataý» memlekettik ulttyq tabiǵi saiabaǵyna jol tartady. Ary qarai ekspeditsiia toby Pavlodar oblysyndaǵy Baianaýyl ulttyq saiabaǵyna, Qarqaraly, Kókshetaý memlekettik ulttyq tabiǵi saiabaqtaryna jáne Qorǵaljyn memlekettik tabiǵi qoryǵyna barady. Osy nysandardyń árqaisysynyń ózindik qaitalanbas atmosferasy bar", - deidi ekspeditsiia jetekshisi, QazaqGeography RQB halyqaralyq jáne ǵylymi jobalar bóliminiń menedjeri Nurjan Alǵashov.
Aita keteiik, atalǵan joba elimizdegi eń mańyzdy týristik klasterlerdi, sondai-aq Qazaqstannyń on bir oblysy boiynsha alty baǵytty qamtidy: «Tian-Shan marjandary», «Altai - órkeniet besigi», «Jetisý Alataýy», «Saryarqa», «Teńizden teńizge deiin» jáne «Jańa Jibek joly». Baǵyttar týrizmdi damytý úshin qyzyqty tabiǵi jáne kieli nysandardy meilinshe kóp qamtý esebimen josparlanǵan. Besinshi jáne altynshy baǵyttar Qyzylorda, Aqtóbe, Mańǵystaý oblystarynyń aýmaǵymen júretin «Teńizden teńizge deiin», sonymen qatar Túrkistan, Jambyl, Almaty oblystary arqyly ótetin «Jańa Jibek joly» bolady. Sońǵy baǵyt boiynsha ekspeditsiiaǵa qazaqstandyq qatysýshylarǵa National Geographic Resei telearnasynyń toby qosylady. «Uly Dala Eline saiahat» jobasynyń qorytyndysy boiynsha týrizmdi damytý turǵysynda kúrdeli máseleler anyqtalyp, olardy sheshýge qatysty usynystar daiyndalady. Sonymen qatar, jańa baǵyttar jasalyp, sýretti jolnusqalar men foto-, video-derekqor qurylady.
