Foto: uiymdastyrýshylardan
"Abai" baspasynan jaryq kórgen 155 kitaptyń tusaýkeseri ótti. Bul baspadan biyl jaryq kórgen kitaptardyń naqty sany. Baspadan shyǵarylǵan kitaptar arasynda qazaq jazýshylarynyń shyǵarmalary, balalar men jasóspirimderge arnalǵan ádebi týyndylar bar, dep habarlaidy Ult.kz.
Qazirgi tańda «Abai» baspasynan shyǵarylǵan kórkem ádebiet kitaptarynyń kóshin Dýlat Babataiuly, Hakim Abai, Shákárim, Máshhúr Júsip Kópeiuly, Muhtar Áýezov, Alashorda qairatkerleriniń shyǵarmalary men keńes odaǵy zamanynyń áigili qalamgerleri bastap tur. Odan bólek baspada qazirgi tańdaǵy Qazaqstannyń kórnekti jazýshylary men jas avtorlarynyń shyǵarmalary da oqyrmanǵa usynylyp otyr.
«Súmbile juldyzy týǵanda» degen kitabym shyqty. Munda burynǵy óleńderimmen qatar jańa jazylǵan «Jasyl tún» degen poemam kirip otyr. Árine, sózsiz qýanyshtymyn. Mundai igi bastama men úshin ǵana emes, barsha qalamger úshin úlken bir jaqsylyq dep oilaimyn», - deidi aqyn Murat Shaimaran.
Foto: uiymdastyrýshylardan
"Abai" baspasy kórkem ádebietten bólek dini-rýhani, tarihi jáne aýyz ádebietindegi tańdaýly týyndylardy oqyrmanǵa usyndy. Atap aitsaq, «Uly tarih jáne uly áýlieler», «Uly dala aqiqaty», «Taraz – órkenietter órimderiniń kýágeri», «Qarahan baba men Aisha bibi», Altybarmaq babamyzdyń «Muhammedtiń paiǵambarlyq dálelderi», «Turmys-salt jyrlary», «Batyrlyq jyr-dastandar», «Liro-epostyq jyrlar», «Turmys-salt ertegileri», «Ańyz-áńgimeler», «Qiial-ǵajaiyp ertegiler», «Aýyz ádebietiniń shaǵyn túrleri», «Haiýanattar týraly ertegiler», taǵy basqalar.
«Uly aǵartýshylardan bastap búkil qazaqtyń aýyz ádebieti, folklory bar – sonyń bárin qosqan kezde qyryq paiyzyn quraidy. Al qalǵan qyryq paiyzy keńes ókimeti men táýelsiz zamandaǵy ómir súrgen bizdiń klassik aqyn-jazýshylarymyz. Qalǵan bóligi jas avtorlarmen tolyqtyrylyp otyr», - deidi «Abai» baspasynyń direktory Aqberen Elgezek.
Foto: uiymdastyrýshylardan
Ótken jyly baspa ujymy 35 kitapty oqyrmandarǵa usynyp, “Aldaǵy jyly qazaqtyń kórkem ádebiet týyndylaryn 100 tomdyqqa jetkizemiz”,- degen edi. Osy jyly baspadan shyǵarylǵan kitaptardyń sany 150 den asyp, ujymnyń ýádesi tolyqtai oryndaldy.
Odan bólek, Abai» baspasy qazaq avtorlary jáne otandyq baspalarmen taǵy bir jańalyqty bólisti. Ol – elektrondyq jáne aýdiokitaptar jariialanatyn biregei internet platforma.
«Bookstagram» dep atalatyn mobildik qosymsha arqyly baspa oqyrmanǵa qazaq kitaptaryn qoljetimdi baǵada usynýdy kózdep otyr. Mobildik qosymshany damytyp, eldiń súiikti onlain kitaphanasyna ainaldyrý arqyly qazirgi tańda avtorlyq quqyqtardy óreskel buzyp, qazaq kitaptaryn túrli áleýmettik jeli arqyly jónsiz taratyp jatqan pirattyq qosymshalarǵa tosqaýyl qoimaq.
Aita keteiik, "Abai" baspasy kitaptyń shyǵýyna ketetin qarjynyń barlyǵyn óz qaltasynan jumsaidy. Degenmen baspadan jaryq kórgen kitaptardyń barlyǵy álemdik suranysqa sai, zamanaýi úlgide, boiaýy bai, biregei dizainda jasaqtalyp, ózine tán tartymdylyǵymen erekshelenedi. "Abai" baspasy óz qarjysyna shyǵarylyp, satylǵan kitaptardan avtorlarǵa qalamaqy tóleitin deńgeige de jetken. Osy jyldyń ózinde 50-den astam avtor men qaitys bolǵan avtorlardyń muragerleri «Abai» baspasynan túrli somadaǵy qalamaqy alǵan.
