Qazaqstan Ulttyq banki bazalyq mólsherlemeni 16,25%-ǵa deiin tómendetti. Mólsherleme +/-1 paiyzdyq pýnkt dálizimen belgilendi, dep habarlaidy ult.kz.
Ulttyq banktiń Aqsha-kredit saiasaty komiteti mundai sheshimdi eldegi infliatsiia qarqynynyń baiaýlaýyna jáne infliatsiialyq kútýlerdiń tómendeýine bailanysty qabyldaǵan.
2026 jylǵy tamyzda jyldyq infliatsiia 9,8%-ǵa deiin tómendedi. Dezinfliatsiialyq protsess 11 ai qatarynan jalǵasyp keledi. Azyq-túlik infliatsiiasy 9,5%-ǵa, azyq-túlikke jatpaityn taýarlar baǵasynyń ósýi 11,4%-ǵa, al servistik infliatsiia 8,9%-ǵa deiin baiaýlaǵan.
Ailyq infliatsiia tamyzda 0,6% boldy. Bazalyq infliatsiia 0,7% deńgeiinde saqtaldy.
Ulttyq bank málimetinshe, halyqtyń aldaǵy bir jylǵa infliatsiialyq kútýleri de tómendegen. Shildede bul kórsetkish 12,1% boldy, al maýsymda 13,4% bolǵan edi. Bul rette naryqtaǵy kásibi qatysýshylardyń 2026 jyldyń sońyna arnalǵan infliatsiialyq boljamy 10% deńgeiinde saqtaldy.
Ulttyq bank 2026 jylǵy infliatsiia boljamyn 9-11% deńgeiinde qaldyrdy. Al 2027 jylǵa arnalǵan boljam 5,5-7,5%-dan 6,5-8,5%-ǵa deiin kóterildi. Buǵan syrtqy infliatsiianyń kúsheiýi, retteletin baǵalar boiynsha boljamnyń qaita qaralýy jáne fiskaldyq yntalandyrýdyń artýy sebep bolǵan.
Sonymen qatar infliatsiia táýekelderiniń teńgerimi proinfliatsiialyq baǵytqa aýysqan. Negizgi táýekelder ishki suranystyń keńeiýi, infliatsiialyq kútýlerdiń turaqsyzdyǵy, janar-jaǵarmai baǵasy men TKSh tarifteriniń ózgerýimen bailanysty.
Qazaqstan ekonomikasynyń 2026 jylǵy ósimi 4,5-5,5% deńgeiinde boljanyp otyr. 2027 jyly JIÓ ósimi shamamen 4,5%, al 2028 jyly 4-5% bolady dep kútiledi.
Ulttyq bank qazirgi infliatsiia men infliatsiialyq kútýlerdiń oń dinamikasy bazalyq mólsherlemeni tómendetýge múmkindik bergenin atap ótti. Alaida 2027 jylǵa qatysty proinfliatsiialyq faktorlardyń kúsheiýine bailanysty mólsherlemeni odan ári tómendetý múmkindigi shekteýli bolýy múmkin.
Budan keiingi sheshimder infliatsiia dinamikasyna, ishki suranysqa, infliatsiialyq kútýlerge, retteletin baǵalarǵa, sondai-aq fiskaldyq jáne kvazifiskaldyq yntalandyrý kólemine qarai qabyldanady.
Ulttyq banktiń bazalyq mólsherleme boiynsha kelesi josparly sheshimi 2026 jylǵy 23 qazanda Astana ýaqytymen saǵat 12:00-de jariialanady.
