Foto: Ádebiet portaly
Qazaqstannyń halyq jazýshysy, kórnekti aqyn Temirhan Medetbek dúnieden ozdy. Qaraly habardy Jazýshylar odaǵy basqarma tóraǵasynyń orynbasary Qasymhan Begmanov jariialady.
— Qazaq poeziiasyna qubylys bolyp kelgen, ulttyń asqaq rýhty uly aqyny Temirhan Medetbek dúnieden ótti.
Qarshadaiymnan óleńderin oqyp, qasyna ergen asyl aǵam, Qazaqstannyń halyq jazýshysy, Qazaqstan Memlekettik syilyǵynyń laýreaty, kórnekti aqyn Temirhan Medetbektiń dúnieden ozǵanyn qazir ǵana Sholpan jeńgem maǵan eń birinshi habarlady.
Sońǵy aptada Temirhan aǵamyzdyń aýyr halde aýrýhanaǵa túsýine bailanysty otbasymen, dárigerlermen Jazýshylar odaǵynyń basshylary únemi habarlasyp turdy.
Qazaqstan Jazýshylar odaǵynyń tóraǵasy Mereke Qulkenov ekeýimiz eki kún barǵanda jansaqtaý bólimine kirgizbegen soń, men «Aǵa, biz kelip turmyz, janyńyzdamyz» dep hat jazyp, qaldyryp ketip edim.
Búgin Mereke Qulkenov, onyń keńesshisi Ámirjan Qosanov jáne belgili kásipker Qanat Sánik tórteýmiz Almatydaǵy aýrýhanada — aǵamyz jatqan jansaqtaý bólimine kezekpen kirip, únsiz baquldasyp, qoshtasyp shyqqan edik.
Iá, ótkende ǵana aǵamyzdyń 80 jasyn dúrkiretip Almatyda toilaǵan edik. 81 jasynda ómirden ótti, — dep jazǵan odaq ókili jelidegi paraqshasyna.
Ol alamanda aldyna jan salmai shapqan daýylpaz aqynnyń dúnieden ótýine orai búkil qazaq halqyna, onyń oqyrmandaryna qatty qaiǵyryp, kóńil aitqan.
Aita keteiik, Temirhan Medetbek 1945 jyly 6 naýryzda Túrkistan oblysynda dúniege kelgen.
Abai atyndaǵy Qazaq memlekettik pedagogika institýty (qazirgi Ulttyq pedagogika ýniversiteti) filologiia fakýltetinde oqyǵan. 1968-2002 jyldary Radio men televideniede, ártúrli gazet-jýrnalda, shyǵarmashylyq uiymdarda qyzmet atqarǵan. Qazaqstan Jazýshylar odaǵynda ekinshi hatshy boldy, 2003 jyldan «Aqiqat» jýrnalynyń bas redaktory.
Alǵashqy jyr jinaǵy «Janymnyń jas quraǵy» degen atpen 1970 jyly jaryq kórdi. Onnan astam óleń jinaqtary jariialanyp, oqyrmandar men synshylardyń joǵary baǵasyn aldy.
«Abai álemi» (1995) jáne «Baba dástúrdiń murageri kim: týǵan ádebiet týraly oilar» (2001) atty ádebi-syn eńbekterinde qalamger Abai áleminiń poetikalyq tereńdigin, qazaq mádenietiniń damý sipatyn saralap, aqyndyq psihologiianyń ishki bolmysyna baǵa berdi.
Qazaq poeziiasynyń túrkiler kezeńinen qalyptasqan romantikalyq-realistik órshil sarynyn ózindik kórkemdik sheshim aiasynda jańashyl týyndylarymen baiytty.
«Kók túrikter saryny» atty jinaǵynda (2002) zamana zary men búgingi kún máseleleri ejelgi túrki jyrlary úlgisinde aitylǵan, aqyn kóne túrge jańa mazmun syidyrǵan.
