Ulttyq jobalardyń júzege asyrylýyna monitoring júrgizý keńsesiniń jetekshisi Arman Evniev ulttyq jobalardy júzege asyrý jumystary jaiynda aityp berdi, dep habarlaidy QazAqparat.
Aita keteiik, jaqynda QR Prezidenti Ulttyq jobalar tizbesin bekitý týraly Jarlyqqa qol qoidy.
Ulttyq jobalardyń iske asyrý úderisine monitoring júrgizýdi júzege asyrý maqsatymen Qazaqstan Respýblikasynyń Úkimeti matritsalyq qurylym negizinde Ulttyq jobalardyń júzege asyrylýyna monitoring júrgizý ofisin qurdy.
Keńse qyzmetkerleri memlekettik organdar men múddeli uiymdardyń aǵymdaǵy shtatty qyzmetkerleriniń qatarynan jasaqtalǵan. Búgin Ortalyq kommnikatsiialar ortalyǵynda keńse jetekshisi Arman Evniev atalǵan ulttyq jobalar bekitilip, tiisti sheshim jasalǵanyn eske saldy.
«Ár jobanyń kórsetkishteri men indikatorlary bar. Jobalyq menedjmenttiń tásili men talaby osy nátijelerge jetkizýdi kózdeidi. Bizdiń ofis jasaqtalǵannan beri arnaiy qajetti normativtik-quqyqtyq baza quryldy. Atap aitqanda, osy jumystyń barysynda ár ulttyq jobany nátijege, josparlanǵan kórsetkishterge jetkizý eskerilgen. Kúndelikti monitoring jasalady. Tiisti qaýlyda kóptegen jańashyldyqtar men innovatsiialyq tásilder bar. Onyń biri – jobalyq- jelilik júieni qurý. Bul turǵyda atalǵan qaýlynyń negizinde ár azamat, ár sarapshy osy monitoringige qatysa alady», - dedi A. Evniev.
Atap aitqanda, belgili bir salalarda qajetti mashyqtardy igergen jáne nietti kez kelgen elimizdiń azamaty belgili bir jobalyq róldi atqara otyryp, tiisti ulttyq jobalarǵa kiretin kez kelgen jobany júzege asyrýǵa naqty atsalysa alady degendi bildiredi. Taratylǵan málimetke qaraǵanda, qazirgi kezde Prezident ákimshiligi men Úkimettiń tapsyrmasyna sáikes, jobalyq basqarýdyń birtutas ekojúiesin qalyptastyrý jumysy aiaqtalyp keledi. Ekojúiege matritsalyq qurylymnyń negizinde memlekettik organdar men olarǵa baǵynyshty mekemelerdiń shtatty qyzmetkerlerinen quralǵan 44 jobalyq ofis kiredi.
Keńse aqparattyq tehnologiialardy paidalana otyryp, ulttyq jobalarǵa onlain-monitoring júrgizetin júieni ázirlep qana qoimai, sonymen qatar barlyq 44 jobalyq ofiske uiymdastyrý-ádistemelik qoldaý kórsetý jáne oqytýmen ainalysady. Óz kezeginde QR UEM Jobalyq basqarý saiasaty departamentiniń direktory Ilona Shvartskopf jobalyq basqarýdy júrgizýdiń erejesinde jobalardy júzege asyrý barysyna monitoringi úshin qoǵamdyq toptardy qurý eskerilgenin aitty.
«Ulttyq jobalardy júzege asyrýda el azamattaryn belsendi qatysýǵa shaqyramyz», - dedi I. Shvartskopf.
