Qazaqstanda biyl qolǵa alynǵan 10 ulttyq jobanyń júzege asýy qalai baqylanady jáne oǵan kim jaýapty? Bul suraqqa elimizdiń Ulttyq ekonomika ministri Áset Erǵaliev jaýap berdi, dep habarlaidy QazAqparat.
«Ulttyq jobalardyń júzege asý barysyn Ulttyq jobalyq keńse qadaǵalap, monitoring júrgizedi. Jobalyq keńseniń arnaiy aqparattyq júiesi jasaqtaldy, monitoring sol júie arqyly jasalady. Osyǵan deiin memlekettik baǵdarlamalardyń iske asyrý barysyna jylyna bir ret monitoring júrgizilse, ulttyq jobalardyń júzege asýy júieli baqylaýda bolady», - dedi Á. Erǵaliev OKQ-de ótken baspasóz máslihatynda.
Ministrdiń aitýynsha, ulttyq jobalardyń iske asý barysyn qadaǵalaýǵa Ulttyq statistika biýrosy da tartylady.
«Ulttyq statistika biýrosy jobalardyń júzege asýy boiynsha saýalnama júrgizedi. Saýalnama suraqtarynyń máni jobalardyń mańyzy men onyń beretin paidasy týraly bolady. Sonyń nátijesinde memlekettik organdar jaýapty ulttyq jobasy boiynsha jumystyń qalai istelip jatqany bilip otyrady. Jáne osal tustary baiqalsa tiisti shara qabyldaidy», - deidi ol.
Odan bólek, vedomstvo basshysy ulttyq jobalardyń oryndalýyna kim jaýapty ekenin aitty.
«Ár ulttyq jobaǵa jaýapty ministrlik bar, iaǵni ministrdiń naqty bir orynbasary tikelei jaýapty bolady. Árine, bul ministrdi jaýapkershilikten bosatpaidy. Sondai-aq, Úkimet tarapynan taǵaiyndalǵan arnaiy kýratorlar bar. Premer-Ministrdiń orynbasarlary. Olar apta saiyn esep berip, ulttyq jobanyń ońtaily júzege asýyn nazarda ustaidy», - dedi elimizdiń bas ekonomisi.
