Qazaqstan armiiasynda eki áskeri qyzmetshi kóz jumdy: 29 shildede Stepnogorskide merzimdik áskeri qyzmetshi Orazbai, 30 shildede Aqtaýda kelisimshart boiynsha áskeri qyzmetshi Merǵaliev óz-ózine qol jumsady, dep habarlaidy "Ult aqparat" QR Ulttyq ulany baspasóz qyzmetiniń málimetine silteme jasap.
29 shilde kúni saǵat 21.00 shamasynda avtopark boiynsha táýliktik kezekshilikte turǵan qatardaǵy jaýynger N.A. Orazbai kezekshiden dárethanaǵa suranyp ketedi. Birshama ýaqyttan keiin ony shaqyryp kelýge shyqqan kezekshi sarbaz avtopark aýmaǵynda ornalasqan qoima ishinde N.A.Orazbaidyń asylyp turǵanyn kórgen.
"Avtoparktiń kezekshi qyzmeti áskeri qyzmetshige jedel meditsinalyq kómek kórsetip, sanitarlyq kólikpen Stepnogorsk Ortalyq qalalyq aýrýhanasyna jetkizgen. Ortalyq qalalyq aýrýhanasynyń dárigerleri sarbazdyń qaitys bolǵanyn rastady", - dep habarlady Ulttyq ulannyń baspasóz qyzmeti.
Qatardaǵy Orazbai 1995 jyly týǵan, Ulttyq ulan qataryna 2021 jyldyń kúzinde Jetisý oblysynyń Panfilov aýdany qorǵanys isteri jónindegi bólimimen shaqyrylǵan.
Al 30 shilde kúni saǵat 05.15-te áskeri bólimge aǵa serjant A. S. Merǵalievtiń óz-ózine qol jumsaǵany týraly aqparat túsken.
"Mán-jaidy naqtylaý kezinde jubaiynyń túngi saǵat 03.30 shamasynda kúieýiniń denesin úiiniń dárethanasynan (turǵylyqty mekenjaiy: Munaily aýdany, Basqudyq aýyly, Baldyrǵan kóshesi 7) taýyp alǵany belgili boldy", - dep habarlady Ulttyq ulan.
Arnaiy komendatýranyń qaraýyl bastyǵy aǵa serjant Merǵaliev Abylai Serikuly 1990 jyly týǵan, úilengen, bir qyzy bar. Ulttyq ulan qatarynda 2015 jyldan bastap qyzmet etken.
Atalǵan faktiler týraly kezekshi qyzmet jelisi boiynsha tiisti organdarǵa habarlandy. Oqiǵalardyń mán-jaiy anyqtalyp, tergeý jumystary júrgizilýde. Qazaqstan Qylmystyq-protsessýaldyq kodeksiniń 201-babyna sáikes, sotqa deiingi tergep-tekserý derekterin jariia etýge tyiym salynǵan.
QR Ulttyq ulanynyń Bas qolbasshylyǵy áskeri qyzmetshilerdiń ata-anasy men jaqyndarynyń qaiǵysyna ortaqtasyp, kóńil aitty.
