قازاقستان ارميياسىندا ەكٸ ەسكەري قىزمەتشٸ كٶز جۇمدى: 29 شٸلدەدە ستەپنوگورسكٸدە مەرزٸمدٸك ەسكەري قىزمەتشٸ ورازباي, 30 شٸلدەدە اقتاۋدا كەلٸسٸمشارت بويىنشا ەسكەري قىزمەتشٸ مەرعاليەۆ ٶز-ٶزٸنە قول جۇمسادى, دەپ حابارلايدى "ۇلت اقپارات" قر ۇلتتىق ۇلانى باسپاسٶز قىزمەتٸنٸڭ مەلٸمەتٸنە سٸلتەمە جاساپ.
29 شٸلدە كٷنٸ ساعات 21.00 شاماسىندا اۆتوپارك بويىنشا تەۋلٸكتٸك كەزەكشٸلٸكتە تۇرعان قاتارداعى جاۋىنگەر ن.ا. ورازباي كەزەكشٸدەن دەرەتحاناعا سۇرانىپ كەتەدٸ. بٸرشاما ۋاقىتتان كەيٸن ونى شاقىرىپ كەلۋگە شىققان كەزەكشٸ سارباز اۆتوپارك اۋماعىندا ورنالاسقان قويما ٸشٸندە ن.ا.ورازبايدىڭ اسىلىپ تۇرعانىن كٶرگەن.
"اۆتوپاركتٸڭ كەزەكشٸ قىزمەتٸ ەسكەري قىزمەتشٸگە جەدەل مەديتسينالىق كٶمەك كٶرسەتٸپ, سانيتارلىق كٶلٸكپەن ستەپنوگورسك ورتالىق قالالىق اۋرۋحاناسىنا جەتكٸزگەن. ورتالىق قالالىق اۋرۋحاناسىنىڭ دەرٸگەرلەرٸ ساربازدىڭ قايتىس بولعانىن راستادى", - دەپ حابارلادى ۇلتتىق ۇلاننىڭ باسپاسٶز قىزمەتٸ.
قاتارداعى ورازباي 1995 جىلى تۋعان, ۇلتتىق ۇلان قاتارىنا 2021 جىلدىڭ كٷزٸندە جەتٸسۋ وبلىسىنىڭ پانفيلوۆ اۋدانى قورعانىس ٸستەرٸ جٶنٸندەگٸ بٶلٸمٸمەن شاقىرىلعان.
ال 30 شٸلدە كٷنٸ ساعات 05.15-تە ەسكەري بٶلٸمگە اعا سەرجانت ا. س. مەرعاليەۆتٸڭ ٶز-ٶزٸنە قول جۇمساعانى تۋرالى اقپارات تٷسكەن.
"مەن-جايدى ناقتىلاۋ كەزٸندە جۇبايىنىڭ تٷنگٸ ساعات 03.30 شاماسىندا كٷيەۋٸنٸڭ دەنەسٸن ٷيٸنٸڭ دەرەتحاناسىنان (تۇرعىلىقتى مەكەنجايى: مۇنايلى اۋدانى, باسقۇدىق اۋىلى, بالدىرعان كٶشەسٸ 7) تاۋىپ العانى بەلگٸلٸ بولدى", - دەپ حابارلادى ۇلتتىق ۇلان.
ارنايى كومەنداتۋرانىڭ قاراۋىل باستىعى اعا سەرجانت مەرعاليەۆ ابىلاي سەرٸكۇلى 1990 جىلى تۋعان, ٷيلەنگەن, بٸر قىزى بار. ۇلتتىق ۇلان قاتارىندا 2015 جىلدان باستاپ قىزمەت ەتكەن.
اتالعان فاكتٸلەر تۋرالى كەزەكشٸ قىزمەت جەلٸسٸ بويىنشا تيٸستٸ ورگاندارعا حابارلاندى. وقيعالاردىڭ مەن-جايى انىقتالىپ, تەرگەۋ جۇمىستارى جٷرگٸزٸلۋدە. قازاقستان قىلمىستىق-پروتسەسسۋالدىق كودەكسٸنٸڭ 201-بابىنا سەيكەس, سوتقا دەيٸنگٸ تەرگەپ-تەكسەرۋ دەرەكتەرٸن جارييا ەتۋگە تىيىم سالىنعان.
قر ۇلتتىق ۇلانىنىڭ باس قولباسشىلىعى ەسكەري قىزمەتشٸلەردٸڭ اتا-اناسى مەن جاقىندارىنىڭ قايعىسىنا ورتاقتاسىپ, كٶڭٸل ايتتى.
