Foto:Polisia.kz
Ulttyq ulannyń áskeri qyzmetshisi jaýyngerlik sambodan álem kýbogynda chempion atandy, – dep habarlaidy Polisia.kz.
15-17 tamyz aralyǵynda Qyrǵyz Respýblikasynyń Sholpan-Ata qalasynda erler men áielder arasynda sambodan álem kýbogy ótti. Eki kún boiy erler men áielder 26 salmaq dárejesinde sporttyq jáne jaýyngerlik sambodan baq synasty. Týrnirdiń ekinshi kúniniń qorytyndysy boiynsha 14 salmaq dárejesinde jeńimpazdar men júldegerler anyqtaldy. Boz kilemge 58, 64, 71, 79, 88, 98 kelige deiingi jáne 98 keliden joǵary salmaqta óner kórsetetin sportshylar shyqty.
Jaýyngerlik sambo boiynsha jáne áielder arasynda 59, 65 jáne 72 keli salmaq dárejesinde saiystar ótti. Jarys qorytyndysy boiynsha Qazaqstan Respýblikasy Ulttyq ulanynyń 6655 áskeri bóliminiń jedel maqsattaǵy 3-batalonynyń atys vzvodynyń zenittik bólimshesiniń mamany qatardaǵy Arman Turymbetov túrikmen sportshysy Iýsýp Táńirberdievti finaldyq jekpe-jekte jeńip, 58 kelige deiingi salmaq dárejesinde I oryn ielendi.
– Tartysty beldesý boldy. Bizdiń komanda tatamide baryn salyp, shaiqasty. QR Ishki ister ministrine, Ishki ister ministriniń orynbasary – Ulttyq ulannyń Bas qolbasshysy Erkin Botaqanovqa atalmysh týrnirde quqyqtyq tártip áskerleriniń namysyn qorǵaýǵa múmkindik bergeni úshin alǵys bildirgim keledi. Biz Ulttyq ulannyń atynan shyǵyp, óner kórsetkenimizdi maqtan etemiz. Sondyqtan ózimizge júktelgen senimdi aqtaýǵa tyrysamyz. Biz óz sheberligimizdi arttyra otyryp, eńbek etýdi jalǵastyramyz jáne quqyqtyq tártip áskerleriniń týyn maqtanyshpen alyp júremiz, – dedi qatardaǵy jaýynger Arman Turymbetov.
Qatardaǵy jaýynger Turymbetov Ulttyq ulanda 2022 jyldan beri qyzmet etip keledi. 2023 jyldyń qyrkúieginde ol álem kýbogynyń ekinshi oryn iegeri atanǵan. Aita keteiik, týrnirdi ótkizýshi el – Qyrǵyz Respýblikasy quramasynyń músheleri bes ret tuǵyrǵa kóterilip, bes qola júldege ie boldy.
