Jýyrda Aqtaý qalasynda ótken «Qoǵamnyń rýhani jańǵyrýy, Qazaqstannyń ulttyq kody men mádenietiniń saqtalýy» taqyrybyndaǵy dóńgelek ústelde Ulttyq ulan Bas qolbasshysynyń tárbie jáne áleýmettik-quqyqtyq jumystar jónindegi orynbasary, general-maior Muhametqali Satov «Ulttyq ulannyń 100 jańa esimi» jobasynyń bastaý alǵanyn aitty, dep habarlaidy "Ult aqparat".
Dóńgelek ústel jumysyna óńir jetekshiligi, quqyq qorǵaý organdary, kúsh qurylymdarynyń ókilderi, tárbieshi ofitserler, ásker ardagerleri men jalpy bilim beretin oqý oryndarynyń oqýshylary qatysty.
Memleket basshysy N.Á. Nazarbaevtyń «Bolashaqqa baǵdar: rýhani jańǵyrý» kólemdi baǵdarlamasyn júzege asyrý, quqyqtyq tártip áskerleriniń igi dástúrleri men tarihyn saqtaý men keleshek urpaqqa jetkizý maqsatynda mundai basqosýlar ziialy qaýym ókilderiniń qatysýymen elimizdiń ár aimaǵynda ótkizilip keledi.
Elbasy óz maqalasynda aitqandai, «Jańa turpatty jańǵyrýdyń eń basty sharty – ulttyq kodyńdy saqtai bilý. Ol zamana synynan súrinbei ótken ozyq dástúrlerdi tabysty jańǵyrtýdyń mańyzdy alǵysharttaryna ainaldyra bilý qajet», – dedi.
– Quqyqtyq tártip áskeriniń aiaǵynan tik turyp, damý tarihy, onyń ótkeni men keleshegi elimizdiń tarihymen etene bailanysty. Ulttyq ulannyń tarihyn memleketimizde tynyshtyqty saqtap, qoǵamdyq qaýipsizdikti qamtamasyz etý arqyly onyń jaýyngerleri jasaidy. El óz batyr erlerin bilýi qajet. Jas urpaq olardyń erligi úlgisinde tárbielenip, aǵa urpaqtyń igi dástúrin laiyqty jalǵastyrýy paryz. Osy oraida jáne «Qazaqstannyń 100 jańa esimi» kólemdi jobasy aiasynda Ulttyq ulan Bas qolbasshysy, general-leitenant Rýslan Jaqsylyqovtyń bastamasymen bizdiń áskerde osyndai tektes «Ulttyq ulannyń 100 jańa esimi» jobasyn ótkizý týraly sheshim qabyldandy, – dedi óz sózinde general-maior Muhametqali Satov.
Atap aitý kerek, atalǵan joba Ulttyq ulannyń ár áskeri bólimin qamtidy. Áskeri bólimsheler qolbasshylyǵy, ásker ardagerleri jáne áskeri qoǵamdyq uiymdar ókilderinen turatyn komissiia quramy laiyqty degen úmitkerlerdi olardyń sińirgen eńbekteri, qyzmettik-jaýyngerlik árekettegi jetistikteri jáne memlekettik nagradalardyń ielik etýine qarai baǵalaidy.
«100 jańa esim» jobasy alǵashqyda ár áskeri bólimde, keiin óńirlik qolbasshylyq deńgeiinde, tek sodan baryp Ulttyq ulan kóleminde irikteledi. Jobanyń jemisti nátijesi retinde Ulttyq ulannyń jańa esimderiniń ómiri men tarihy týraly arnaiy kitap jaryqqa shyqpaq. Sondai-aq, jańa esimder jaily málimetter vedomstvonyń resmi saitynda da ornalastyrylady. Joba 2018 jyldyń maýsym aiyna deiin jalǵasatyn bolady.
