Qańtar oqiǵasy kezinde Ulttyq ulan men politsiiaǵa kúsh qoldanǵandar sottaldy. Bul týraly QR Ishki ister ministrligi Tergeý departamentiniń basshysy Sanjar Ádilov aitty, dep habarlaidy QazAqparat.
«Jurtshylyqqa tek resmi derekkózderden ǵana emes, sondai-aq áleýmettik jelilerdegi kóptegen beinejazbalardan jappai tártipsizdik kezinde quqyq qorǵaý organdarynyń qyzmetkerlerine qatysty qatygez túrdegi zorlyq-zombylyq faktileri belgili. Olardyń kópshiligi óz mindetterin oryndap júrgen qyzmetkerdiń ómirine qaýip tóndirý retinde baǵalanady. Mundai áreketter úshin qatań qylmystyq jaýapkershilik kózdelgen», - dedi Sanjar Ádilov Ortalyq kommýnikatsiialar qyzmetinde.
Onyń aitýynsha, 5 qańtarda Semei qalasyndaǵy tártipsizdikter kezinde osy qalanyń turǵyny zańsyz áreketterdi toqtatý týraly zańdy talapqa baǵynbai, qoǵamdyq tártipti qamtamasyz etýge qatysqan Ulttyq ulannyń áskeri qyzmetshisine dene jaraqatyn salǵan. Sot úkimimen ol kináli dep tanylyp, 4 jylǵa bas bostandyǵynan aiyryldy.
«3 qańtarda Óskemen qalasynda politsiia qyzmetkerleriniń zańsyz miting uiymdastyrý áreketteriniń jolyn kesý kezinde osy qalanyń turǵyny olarǵa qarsylyq kórsetip, kúsh qoldanǵan. Óskemen sotynyń úkimimen ol kináli dep tanylyp, 3 jylǵa bas bostandyǵynan aiyryldy», - dedi S. Ádilov.
«Jappai tártipsizdik kezinde qyzmetkerlerge qatysty kúsh qoldaný faktileri boiynsha birqatar qylmystyq is áli de qaralyp jatyr. Olar jaqyn arada sotqa jiberiletin bolady», - dedi vedomstvo ókili.
