قاڭتار وقيعاسى كەزٸندە ۇلتتىق ۇلان مەن پوليتسيياعا كٷش قولدانعاندار سوتتالدى. بۇل تۋرالى قر ٸشكٸ ٸستەر مينيسترلٸگٸ تەرگەۋ دەپارتامەنتٸنٸڭ باسشىسى سانجار ەدٸلوۆ ايتتى, دەپ حابارلايدى قازاقپارات.
«جۇرتشىلىققا تەك رەسمي دەرەككٶزدەردەن عانا ەمەس, سونداي-اق ەلەۋمەتتٸك جەلٸلەردەگٸ كٶپتەگەن بەينەجازبالاردان جاپپاي تەرتٸپسٸزدٸك كەزٸندە قۇقىق قورعاۋ ورگاندارىنىڭ قىزمەتكەرلەرٸنە قاتىستى قاتىگەز تٷردەگٸ زورلىق-زومبىلىق فاكتٸلەرٸ بەلگٸلٸ. ولاردىڭ كٶپشٸلٸگٸ ٶز مٸندەتتەرٸن ورىنداپ جٷرگەن قىزمەتكەردٸڭ ٶمٸرٸنە قاۋٸپ تٶندٸرۋ رەتٸندە باعالانادى. مۇنداي ەرەكەتتەر ٷشٸن قاتاڭ قىلمىستىق جاۋاپكەرشٸلٸك كٶزدەلگەن», - دەدٸ سانجار ەدٸلوۆ ورتالىق كوممۋنيكاتسييالار قىزمەتٸندە.
ونىڭ ايتۋىنشا, 5 قاڭتاردا سەمەي قالاسىنداعى تەرتٸپسٸزدٸكتەر كەزٸندە وسى قالانىڭ تۇرعىنى زاڭسىز ەرەكەتتەردٸ توقتاتۋ تۋرالى زاڭدى تالاپقا باعىنباي, قوعامدىق تەرتٸپتٸ قامتاماسىز ەتۋگە قاتىسقان ۇلتتىق ۇلاننىڭ ەسكەري قىزمەتشٸسٸنە دەنە جاراقاتىن سالعان. سوت ٷكٸمٸمەن ول كٸنەلٸ دەپ تانىلىپ, 4 جىلعا باس بوستاندىعىنان ايىرىلدى.
«3 قاڭتاردا ٶسكەمەن قالاسىندا پوليتسييا قىزمەتكەرلەرٸنٸڭ زاڭسىز ميتينگ ۇيىمداستىرۋ ەرەكەتتەرٸنٸڭ جولىن كەسۋ كەزٸندە وسى قالانىڭ تۇرعىنى ولارعا قارسىلىق كٶرسەتٸپ, كٷش قولدانعان. ٶسكەمەن سوتىنىڭ ٷكٸمٸمەن ول كٸنەلٸ دەپ تانىلىپ, 3 جىلعا باس بوستاندىعىنان ايىرىلدى», - دەدٸ س. ەدٸلوۆ.
«جاپپاي تەرتٸپسٸزدٸك كەزٸندە قىزمەتكەرلەرگە قاتىستى كٷش قولدانۋ فاكتٸلەرٸ بويىنشا بٸرقاتار قىلمىستىق ٸس ەلٸ دە قارالىپ جاتىر. ولار جاقىن ارادا سوتقا جٸبەرٸلەتٸن بولادى», - دەدٸ ۆەدومستۆو ٶكٸلٸ.
