.jpg)
Nur-Sultanda, QR Prezidenti janyndaǵy OKQ-de Aqparat jáne qoǵamdyq damý, Mádeniet jáne sport, Bilim jáne ǵylym ministrlikteriniń «Ulttyq rýhani jańǵyrý» Ulttyq jobasy: negizgi baǵyttar» taqyrybynda brifingi ótti, dep habarlaidy "Ult aqparat".
QR Aqparat jáne qoǵamdyq damý ministri brifing barysynda Ulttyq joba Memleket Basshysy Qasym-Jomart Toqaevtyń tapsyrmasy boiynsha ázirlenip, qazaqstandyq qoǵamnyń mádeniet, aǵartý jáne ulttyq rýh deńgeiin arttyrýǵa baǵyttalǵanyn atap ótti.
Aida Balaeva Ulttyq joba Tuńǵysh Prezident – Elbasy Nursultan Nazarbaevtyń baǵdarlamalyq maqalasynda aitylǵan «Rýhani jańǵyrý» qundylyqtaryn ilgeriletýdiń kelesi kezeńi bolyp tabylatynyn atap ótti.
«Mazmuny jaǵynan bul máni tereń, aýqymy óte keń Joba. Bul – qanshama ǵasyrlar boiy qalyptasqan halqymyzdyń mádeni bolmysy, tarihy men tamyry. Sondyqtan, ásirese qazirgi jahandaný kezeńinde ony saqtap qalý, urpaq boiyna sińirýdiń mańyzy zor. Búgingi urpaq boiyna «ulttyq kod» uǵymyn qanshalyqty tereń sińirsek – ol bizdiń erteńgi ult bolyp qalýymyzdyń kepili», - dep atap ótti ministr.
Ulttyq joba úsh baǵyt boiynsha iske asyrylady, olardy oryndaýǵa birden úsh ministrlik qatysady. Qujatqa jeti mindet, 20-dan astam kórsetkish jáne 60-tan astam iri is-sharalar kiredi.
Birinshi baǵyt – eldiń ziiatkerlik áleýetin jáne memlekettik tildiń mártebesin arttyrý. Ol sapaly kontentti ulǵaitý arqyly iske asyrylatyn bolady.
Elimizdiń ziiatkerlik áleýetin damytý boiynsha 38 joba josparlanǵan. 2025 jylǵa deiin barlyq oqýshylardy elimizdiń mádeni murasymen tereńirek tanystyratyn jobamen qamtý josparlanýda, al «Oqityn ult» jobasy qazaqstandyqtardyń oqyrmandyq belsendiligin arttyrýy tiis.
Memlekettik til mártebesin damytý úshin oqý baǵdarlamalary men ádistemeler jańartylatyn bolady. Qazaq tiliniń ulttyq korpýsyn qurý, latyn álipbiin engizýdi jalǵastyrý jáne qazaq tilin damytýǵa múddeli barlyq adamdardy oqý ádebietimen qamtamasyz etý josparlanýda.
Ekinshi baǵyt – «El rýhy» qazaqstandyq kino ónimderi men mýltfilmder óndirisin jeńildetýge, otandyq sýretshiler men fotograftardyń kórmelerin, qazaqstandyq estrada metrleriniń kontsertterin qoljetimdi etýge múmkindik beretin sharalar keshenin biriktiredi.
Aida Balaeva ekinshi baǵytty iske asyrý 2025 jylǵa qarai bes naqty nátijege qol jetkize otyryp, shamamen 13 iri mádeni is-sharany qamtitynyn atap ótti. Kontsertter, spektaklder men túrli kórmeler Qazaqstannyń iri qalalarynda ǵana emes, sondai-aq elimizdiń shalǵai aýdandarynda da ótedi dep boljanýda. 2025 jylǵa qarai 40 animatsiialyq film jasalady, al kinoprokattaǵy otandyq filmderdiń úlesi keminde 25%-dy quraityn bolady.
QR Aqparat jáne qoǵamdyq damý ministri óz sózinde «E-culture.kz» biryńǵai elektrondyq platforma jobasyn atap ótti: «Joba otandyq mádeniettiń barlyq jetistikterine erkin rejimde onlain túrde qol jetkizýge múmkindik beredi. Jer sharynyń kez kelgen núktesinen, úiden shyqpai-aq, bizdiń murajailar men teatrlarǵa, kitaphanalarǵa jáne basqa da mádeni kórikti jerlerge barýǵa bolady», - dep atap ótti Aida Balaeva.
Úshinshi baǵyt – «Táýelsizdik urpaqtary» jastar úshin jańa múmkindikter jasaýǵa baǵyttalǵan.
Ministr Aida Balaeva bul baǵyt jastardyń negizgi problemalaryn – qoljetimdi bilim, jumyspen qamtý jáne turǵyn úidi sheshýge kómektesýi tiis ekenin túsindirdi. Osy baǵyt sheńberinde keminde 800 myń jas turǵyn úi jinaqtary júiesin paidalana alady; 1 mln-ǵa jýyq jastar qazaqstandyq áleýmettik qyzmettermen qamtamasyz etiledi; barlyq baǵdarlamalar boiynsha jas otbasylar úshin qaryz úlesi 25%-ǵa deiin artady; 1,5 mln-ǵa jýyq jastar sporttyq jáne ekologiialyq jobalarǵa tartylatyn bolady.
«NEET kategoriiasy dep atalatyn jastardy qoldaý sharalaryna erekshe nazar aýdarǵym keledi, onda biz jumyspen qamtylmaǵan jastardyń sanyn 5%-ǵa deiin tómendetýdiń naqty mindetin qoiamyz», - dedi Aida Balaeva.
Brifing barysynda BAQ ókilderi «Ulttyq Rýhani jańǵyrý» Ulttyq jobasy boiynsha suraqtar qoiyp, olarǵa QR AQDM basshysy Aida Balaeva, Mádeniet jáne sport vitse-ministri Nurǵisa Dáýeshov, QR Bilim jáne ǵylym ministrliginiń ókili Ádilbek Qabaev jaýap berdi.
