QR Mádeniet jáne sport vitse-ministri Nurǵisa Dáýeshov «Ulttyq rýhani jańǵyrý» ulttyq jobasy aiasynda mádeniet salasynda atqarylatyn jumystardy aitty, dep habarlaidy QazAqparat.
Ulttyq jobany iske asyrý úshin úsh birdei ministrliktiń kúshi jumyldyrylady, iaǵni Aqparat jáne qoǵamdyq damý ministrligi, Mádeniet jáne sport ministrligi, Bilim jáne ǵylym ministrligi qamtylady.
Ulttyq jobanyń mádeniet salasy bóliginde kelesi baǵyttardy qamtidy:
- «Rýhani jańǵyrý» qundylyqtaryn ilgeriletý jáne memlekettik tildi damytý;
- «El rýhy» jobasy.
Onyń aitýynsha, atalǵan baǵyttar aiasynda kelesi mindetter alǵa qoiyldy - mektep jasyndaǵy balalardy mádeni tárbiemen qamtý, «Oqityn ult» jobasy aiasynda halyqtyń kitap oqý belsendiligin arttyrý, mádeniet salasynda kórsetiletin qyzmetterdiń qoljetimdiligi men sapasyn arttyrý jáne otandyq mádeni ónimdi tanymal etý.
Vitse-ministrdiń sózine qaraǵanda, «Oqityn ult» jobasy aiasynda halyqtyń kitap oqý belsendiligin arttyrý atty kórsetkishke sáikes, ministrlik 5 is-sharany júrgizýdi kózdedi.
Bul sharalar turǵyndardyń, sonyń ishinde balalar men jasóspirimderdiń oqý saýattylyǵyn arttyrý men kitap oqý mádenietin damytýǵa, otandyq qalamgerlerdi, sonyń ishinde jas aqyn-jazýshylardy memleket tarapynan yntalandyrý men qoldaýǵa baǵyttalǵan.
Atap aitqanda, ministrliktiń qoldaýymen 2007 jyldan beri turaqty túrde jyl saiyn ótkizilip kele jatqan «Bir el - bir kitap» oqý aktsiiasy endigi jerde jańa formatta usynylady.
Sonymen qatar, búgingi tańda kitaphananyń oqyrmandarǵa usynatyn onlain qyzmetin jetildirý máselesi ózekti. Osyǵan orai ministrlik Qazaqstan ulttyq elektrondy kitaphanasynyń qyzmetin jetildirý, modifikatsiialaý jáne oqyrmandar úshin mobildi qosymshalar arqyly elektrondy kitaphanany qoljetimdi etý jumystaryn júrgizedi.
Budan bólek, óńirlerdegi kópshilikke arnalǵan kitaphanalar «Ádebi ólketaný» jobasyn uiymdastyrýdy josparlap otyr.
Osy rette joba aiasynda árbir óńirge tiesili ádebieti men aqyn-jazýshylarynyń shyǵarmashylyǵyn ózge óńirlerdegi oqyrmandarǵa tanystyrý jáne nasihattaý sharalaryna basymdyq beriledi.
Munymen qosa, ministrlik otandyq qalamgerlerdi yntalandyrý maqsatynda 2022 jyldan bastap «Úzdik balalar shyǵarmasy», «Jyldyń úzdik kitaby» baiqaýyn uiymdastyrady.
Sondai-aq, otandyq jas qalamgerlerge memlekettik qoldaý kórsetý, jańa esimderdi ulyqtaý maqsatynda jas aqyn-jazýshylarǵa Prezidenttiń arnaiy «Aiboz» ádebi syilyǵy taǵaiyndalady.
