QR Mádeniet jáne sport ministri Arystanbek Muhamediuly ulttyq operalarǵa degen suranystyń artyp kele jatqanyn aityp berdi, dep habarlaidy QazAqparat tilshisi.
«Búgingi tańda bizdiń teatrlar kórermenderdiń úlken yqylasyna, nazaryna ie ekenin aita alamyn. «Astana Operada» barlyq spektaklderdiń biletteri eki ai buryn ótip ketedi. Budan buryn ulttyq operalardyń repertýaryn saqtaý úshin shyny kerek, zalǵa stýdentterdi qýyp tyǵatynbyz. Sebebi, eger opera tabysqa ie bolmasa, ony repertýardan alyp tastaýy kerektigi týraly talap bar», - dedi ministr Úkimettiń baspasóz ortalyǵynda ótken brifing barysynda.
Ministrdiń aitýynsha, bizde ainaldyrǵan úsh-tórt ulttyq opera bar.
«Olardy repertýardan alyp tastasaq jaramaidy ǵoi. Sol úshin biz amaldyń joqtyǵynan stýdentterdi, aǵaiyn-týystardy aparyp «Minekei, kórermen keldi» dep otyrǵyzyp qoiatynbyz. Al qazirgi tańda eń birinshi kezekte ulttyq operalardyń biletteri ótip jatyr. Abai operasy, Birjan Sara, Qyz-Jibek operasyna kelýshiler jeterlik. Qyzyqty bolǵannan keiin halyq operaǵa keledi. Al eger de joǵary deńgeide bolmasa, qazirgi ýaqytta kórermendi teatrǵa kúshtep apara almaisyń», - dedi Arystanbek Muhamediuly.
