Foto: Iran jeńil atletika federatsiiasy
Iran Islam Respýblikasynyń astanasy Tegeranda ótken jeńil atletikadan jabyq keshendegi XI Aziia chempionatynda Qazaqstan Ulttyq quramasy 12 medal jeńip aldy, dep habarlaidy "Ult aqparat".
QR Týrizm jáne sport ministrligi málim etkendei, biylǵy básekede Qazaqstan sportshylary 4 altyn, 2 kúmis pen 6 qola júldege qol jetkizdi.
Sheshýshi jarys kúni estafetada (4*400 m) elimizdiń erler (Andrei Sokolov, Elnor Mýhitdinov, Efim Tarasov, Viacheslav Zems) jáne áielder quramasy (Adelina Zems, Anna Shýmilo, Mariia Shývalova, Kristina Kondrashova) top jardy. Onyń aldynda Elizaveta Matveeva (biiktikke sekirý) men David Efremov (60 m kedergiler arqyly júgirý) chempion atandy.
Kúmis júldelerddi Ivan Ivanov (iadro laqtyrý) men Olga Safronova (60 m júgirý) jeńip aldy.
Al qola júldegerlerdi Aiana Bolatbekqyzy (1500 m júgirý), Mariia Efremova (3 qarǵyp sekirý), Aqbaian Murmámet (800 m júgirý), Alina Chistiakova (kópsaiys) Efim Tarasov (400 metr júgirý), Maksim Frolovskii (3000 metrge júgirý) ielendi.
Maksim Frolovskii 3 myń metrge júgirýde márege 5-bolyp kelgen. Alaida aldyńǵy 2 adam ereje buzǵandyqtan qola medal qazaqstandyq atletke berildi. Sondai-aq Maksim 23 jasqa deiingi sanatta Qazaqstan rekordyn tirkedi (8:17.17).
Tegeranda barlyǵy 29 qazaqstandyq atlet el namysyn qorǵady.
Byltyr jabyq keshendegi Aziia chempionaty Astana qalasyndaǵy Qazaqstan jeńil atletika kesheninde ótken. Ol kezde Ulttyq qurama 6 altyn, 3 kúmis, 3 qola medalmen jalpy esepte 2-oryn alǵan.
