Búgin Úkimet otyrysynda Premer-Ministrdiń birinshi orynbasary Álihan Smaiylov respýblikalyq biýdjettiń salyq kiristeri 29%-ǵa ósetinin aitty, dep habarlaidy "QazAqparat" HAA.
«Qazaqstan Respýblikasy ekonomikasynyń damý boljamy jahandyq faktorlar men ishki ahýaldy eskere otyryp, qalyptastyryldy. 2022-2026 jyldarǵa arnalǵan makroekonomikalyq boljamǵa sáikes, elimizdiń jalpy ishki óniminiń naqty ortasha jyldyq ósý qarqyny 4,8 paiyzdy quraidy. Biýdjet jobasynda kiristerdiń ósýi ekonomika ósiminen ozyq qarqynmen josparlandy. Mysaly, jalpy ishki ónim 2022 jyly nominaldy túrde 8,4%-ǵa ósse, respýblikalyq biýdjettiń salyq kiristeri 29%-ǵa ósetin bolady. Bul orta merzimdi kezeńde Ulttyq qordan táýeldilikti tómendetýge múmkindik beredi», - dedi Smaiylov.
Nátijesinde, Ulttyq qordan beriletin transfertter kólemi 2022 jyly 1,6 trln teńgege, 2023 jyly 350 mlrd teńgege, 2024 jyly 200 mlrd teńgege azaityla otyryp, tartylatyn bolady.
«Biýdjet jobasy teńgerimdelgen jáne Nur Otan partiiasynyń sailaýaldy baǵdarlamasynda belgilengen jalpyulttyq basymdyqtar men mindetterge sáikes keledi. Barlyq áleýmettik mindettemeler tolyǵymen oryndalatyn bolady. Bul rette biýdjet qarajatyn barynsha tiimdi paidalaný qajet. Jalpy alǵanda, Qazaqstan ekonomikasynyń orta merzimdi kezeńdegi damý perspektivalary ulttyq ekonomikany nyǵaitýǵa, básekelestikti damytýǵa jáne áleýmettik turaqtylyqty saqtaýǵa baǵyttalǵan», - dedi Premer-Ministrdiń birinshi orynbasary.
