Ulttyq bank tóraǵasynyń orynbasary Áliia Moldabekova Ulttyq qordyń valiýtalyq aktivteri bir aida 800 mln dollarǵa ulǵaiyp, 58,5 mlrd AQSh dollaryna jetkenin aitty, dep habarlaidy "Ult aqparat".
«Jedel derekter boiynsha mamyrdyń sońynda Ulttyq qordyń valiýtalyq aktivteri bir aida 800 mln AQSh dollaryna ulǵaiyp, 58,5 mlrd AQSh dollaryn qurady. Ótken aida Ulttyq qordyń valiýtalyq aktivteriniń ósýi valiýtalyq túsimderdiń ulǵaiýyna jáne oń investitsiialyq kiriske bailanysty boldy. Mamyrda valiýtalyq túsimder 720 mln AQSh dollaryn qurady. Qorǵa túsetin túsimderdiń eleýli deńgeii biyl munai baǵasynyń qalpyna kelýine jáne mamyrdaǵy úlken salyq tólemderiniń kezeńine bailanysty qalyptasty», - dep túsindirdi Ulttyq bank tóraǵasynyń orynbasary.
Sondai-aq, ol ótken aida aktsiialar naryǵynda da oń úrdis jalǵasyn tapqanyn atady.
«Obligatsiialar men altyn baǵasynyń qalpyna kelýine bailanysty Ulttyq qordyń investitsiialyq kirisi mamyrda shamamen 660 mln AQSh dollaryn nemese 1,15%-dy qurady. Sonymen qatar, mamyrda 251 mlrd teńge kóleminde kepildik berilgen jáne nysanaly transfertterdi bólý úshin Ulttyq Bank qordyń valiýtalyq aktivterin 553 mln AQSh dollary somasyna (balamasy 237 mlrd teńge) satty. Bul rette transfertterdiń bir bóligi teńgedegi shottaǵy qaldyqtar men teńgedegi túsimder esebinen qanaǵattandyryldy», - dedi Áliia Moldabekova.
