Ulttyq qordyń aktivteri naýryzda 2,5 mlrd AQSh dollaryna tómendedi. Bul týraly búgin Úkimet otyrysynda QR Ulttyq bank tóraǵasy Erbolat Dosaev aitty, dep habarlaidy "Ult aqparat".
«Aldyn ala derekter boiynsha, Ulttyq banktiń altyn-valiýta rezervteri osy jylǵy naýryzda 30 mlrd AQSh dollaryna deiin 0,3 paiyzǵa nemese 79 mln AQSh dollaryna ulǵaidy. Ulttyq banktegi ekinshi deńgeili bankterdiń shottaryna 1,5 mlrd AQSh dollary mólsherindegi shetel valiýtasynyń túsimi valiýta naryǵynda interventsiialarmen teńestirildi», - dedi UB tóraǵasy.
Onyń dereginshe, Ulttyq qordyń aktivteri naýryz aiynda aktsiialar naryǵynyń 13 paiyzǵa quldyraýy jáne kepildik berilgen transferttiń bólinýi esebinen bir aida 2,5 mlrd AQSh dollaryna nemese 4,2 paiyzǵa tómendep, 57,5 mlrd AQSh dollaryn qurady. Bul rette aktsiialar naryǵy jyldyń basynan beri shamamen 32 paiyz joǵaltyp, 23 naýryzda eń tómengi mánge jetti.
«Osyǵan bailanysty halyqaralyq jalpy rezervter osy jylǵy naýryzdyń sońynda 87,4 mlrd AQSh dollary boldy. Úkimetter men ortalyq bankter tarapynan búkil álem boiynsha qosymsha ótimdilikti bólý jónindegi ekonomikany qoldaýdyń aýqymdy sharalaryna bailanysty aktsiialar naryǵy qalpyna kele bastady. Máselen, biyl sáýirdiń basynan beri Ulttyq qor aktsiialary indeksiniń kiristiligi +6,5% boldy. Jalpy alǵanda, Ulttyq qordyń investitsiialyq kiristiligi osy jylǵy sáýirdiń alǵashqy 10 kúni 850 mln AQSh dollarynan asty. Sonyń nátijesinde Ulttyq qordyń valiýtalyq aktivteriniń kólemi aǵymdaǵy sátte 58,2 mlrd AQSh dollaryn quraidy», - dedi Erbolat Dosaev.
