2022 jyly respýblikalyq biýdjet kirisi 9,2 trln teńgeni quraidy. Bul týraly Senattyń jalpy otyrysynda QR Ulttyq ekonomika ministri Áset Erǵaliev aitty, dep habarlaidy QazAqparat.
«Respýblikalyq biýdjettiń kirisi 2022 jyly boljam boiynsha - 9,2 trillion teńgeni, 2023 jyly – 9,7 trillion teńgeni, 2024 jyly - 10,4 trillion teńgeni quraidy. Kepildendirilgen transfertti 2022 jyly – 2,4 trillion teńge, 2023 jyly – 2,2 trillion teńge jáne 2024 jyly 2 trillion teńge mólsherinde aiqyndaý usynylyp otyr. Osyny eskere otyryp, Ulttyq qordan sáikes úsh jylǵa kepildendirilgen transfert týraly zań jobasy ázirlendi», - dedi «Áleýmettik-ekonomikalyq damý boljamy» jáne «Ulttyq qordan kepildendirilgen transfert týraly» zań jobasy týraly baiandaǵan ministr.
Onyń atap ótýinshe, tartylatyn qarajat respýblikalyq biýdjetten tólenetin ortaq jáne memlekettik bazalyq zeinetaqy tólemderine jumsalady.
Qosymsha Ulttyq qordan kelesi jylǵa 550 milliard teńge, odan keiingi eki jylǵa 400 milliard teńgeden nysanaly transfert tartý josparlanǵan.
«Bul qarajatty «Nur-Otan» partiiasynyń sailaýaldy baǵdarlamasynyń is-sharalaryn qarjylandyrýǵa baǵyttaý usynylady. Josparlanyp otyrǵan transfertterdi eskere otyryp munai baǵasy barreline 60 dollar bolǵan kezde munai sektorynan Ulttyq qorǵa túsetin túsimder boljam boiynsha 2022 jyly 2,5 trillion teńgeden 2024 jyly 3 trillion teńgege deiin ulǵaiady. Osy aralyqta Ulttyq qordyń valiýtalyq aktivteri de 55,3 milliard dollardan 61,6 milliard dollarǵa deiin artady dep boljanýda», - dedi Áset Erǵaliev.
