Respýblikalyq biýdjetke kepildendirilgen transfert 2020-2021 jyldary 2,7 trln teńge mólsherinde aiqyndaldy.
Bul týraly eldiń 2020-2024 jyldarǵa arnalǵan áleýmettik-ekonomikalyq damý boljamyn tanystyrý kezinde QR Ulttyq ekonomika vitse-ministri Mádi Takiev málim etti, dep habarlaidy QazAqparat.
«Makroekonomikalyq boljamnyń negizinde 2020-2022 jyldarǵa arnalǵan biýdjet parametrleri men Ulttyq qordyń boljamy ázirlendi. Respýblikalyq biýdjettiń kiristeri (transfertterdi qospaǵanda) 2020 jyly 8 trln teńge somasynda, 2021 jyly – 8,6 trln teńge, 2022 jyly – 9,4 trln teńge somasynda boljanady», - dep toqtaldy M. Takiev Parlament Májilisinde.
Onyń sózine qaraǵanda, Ulttyq qordy qalyptastyrý jáne paidalaný tujyrymdamasyna sáikes, respýblikalyq biýdjetke kepildendirilgen transfertti 2020-2021 jyldary 2,7 trln teńge mólsherinde, al 2022 jyly 2,6 trln teńgege deiin tómendetýmen aiqyndaldy.
«Osyny eskere otyryp, «Qazaqstan Respýblikasynyń Ulttyq qorynan 2020-2022 jyldarǵa arnalǵan kepildendirilgen transfert týraly» zań jobasy ázirlendi. Ulttyq qordy josparly paidalaný Ulttyq qordaǵy qarajattyń tómendetilmeitin qaldyǵy boiynsha shekteýdiń oryndalýyn (JIÓ-niń keminde 30%) qamtamasyz etedi», - dep túsindirdi M. Takiev.
Vitse-ministrdiń aitýynsha, biýdjet tapshylyǵy 2020 jyly jalpy ishki ónimniń 2,1%, keiinnen 2021 jyly – 1,5% deiin jáne 2022 jyly – 1 % deiin tómendetilgen mólsherinde belgilendi.
«Osy parametrlerdi esepke ala otyryp, respýblikalyq biýdjettiń shyǵystary 2020 jyly 12,7 trln teńge, 2021 jyly 13,2 trln teńge, 2022 jyly – 13,6 trln teńge kóleminde belgilendi», - dedi Mádi Takiev.
