Búgin Parlament Májilisiniń jalpy otyrysynda palata depýtattary «QR Ulttyq qorynan 2020 - 2022 jyldarǵa arnalǵan kepildendirilgen transfert týraly» zań jobasyn maquldady, dep habarlaidy QazAqparat.
«Ulttyq qordy qalyptastyrý jáne paidalaný tujyrymdamasyna sáikes, respýblikalyq biýdjetke kepildendirilgen transfertti 2020-2021 jyldary 2 trln 700 mlrd teńge mólsherinde, al 2022 jyly 2 trln 600 mlrd teńgege deiin tómendetýmen aiqyndaldy», - dedi Ulttyq ekonomika ministri Rýslan Dálenov.
2020-2022 jyldarǵa aiqyndalǵan Ulttyq qordan kepildendirilgen transferttiń mólsheri Ulttyq qordaǵy qarajatty jalpy ishki ónimniń 30 paiyzy mólsherinen tómendetpeý týraly sharttyń oryndalýyn qamtamasyz etedi.
Jalpy otyrys barysynda depýttar Ulttyq qordan kepildendirilgen transfert kólemin tómendetý úrdisi týraly surady.
«Ulttyq qordyń jinaqtalýy mańyzdy. Memleket basshysy Joldaýynda tapsyrǵandai, Ulttyq qordan kepildendirilgen transfert kólemi tómendeidi, tómendetý kestesi ázirlendi. 2022 jyly transfert 100 mlrd teńgege qysqartylady. 2023-2025 jyldary kezeńinde jyl saiyn 200 mlrd teńgege tómendeidi. Al 2025 jyldan bastap Ulttyq qordan kepildendirilgen transfert kólemi 2 trln teńgege deiin qysqarady. Bul týraly Memleket basshysyna osy jyldyń 15 qazanynda Ekonomikany damytý jónindegi keńeste baiandaldy. Biyldyń sońyna deiin Ulttyq qor tujyrymdamasyna qajetti ózgerister engiziletin bolady», - dedi Rýslan Dálenov.
