Foto: © Pixabay / Alexandr Podvalny
Qarjy ministrliginiń biýdjettik kreditteý, ulttyq qor jáne qarjy sektory máseleleri jónindegi ózara is-qimyl departamentiniń direktory Aibol Arǵynǵazin Ulttyq qordan balasyna aqsha kútip júrgen ata-analarǵa úndeý jasady, dep habarlaidy Kazinform agenttigi.
«Eń bastysy, ata-analardan ótinip suraitynymyz — balalaryn jeke qujattandyrý máselesine jiti nazar aýdaryp, sony qarasa. Qandai da bir sebeppen qujattary bolmai jatsa, sony jasatsa. Tipti qandai da bir adami faktorlardyń sebebinen azamattardyń málimeti bazadan túsip qalǵan jaǵdai bolsa, ondai kúnniń ózinde de bala qarajatsyz qalmaidy. Mysaly biyl málimetter bazasynda bolmai qalsa, kelesi jyly ótken jyldyń jyldyń tólemi qosa aýdarylyp otyrady. Ondai múmkindik kózdelgen. Sondyqtan eshbir bala Ulttyq qor qarajatynan shet qalmaidy», — dedi Aibol Arǵynǵazinov.
Onyń sózinshe, ata-analardyń negizgi tekseretin eki kózi bolady.
«Birinshisi — elektrondy úkimet portaly. Ekinshisi — Biryńǵai jinaqtaýshy qorynyń portaly. Osy ekeýiniń de mobildi qosymshasynan kórýge bolady. Mysaly, BJZQ-da ol jeke sáikestendirý nómirin terý arqyly kórinetin bolsa, elektrondy úkimet portalynda árbir ata-ananyń jeke kabinetinde kórinip turady. Qazirgi kezde proaktivti qyzmettiń túri bar ekenin bilesizder. Onda ata-ananyń búkil balalary, olardyń qandai mektepke baratyny, balabaqshadaǵy kezegi, densaýlyǵy týraly barlyq málimetter shoǵyrlandyrylǵan. Sonyń ishinde qosymsha Ulttyq qordan jasalatyn tóleý týraly málimette bolady. Bul integratsiia qazir kózdelgen. Jańa jyldan bastap kórýge, tekserýge bolady», — dedi ministrlik ókili.
