Foto: depositphotos.com
Prezident Qasym-Jomart Toqaev Ulttyq qordan balalarǵa qarjy tóleý týraly zańǵa qol qoidy, - dep habarlaidy "Ult aqparat" Aqordanyń baspasóz qyzmetine silteme jasap.
"Memleket basshysy "Qazaqstan Respýblikasynyń keibir zańnamalyq aktilerine Qazaqstan Respýblikasynyń Ulttyq qorynan balalarǵa arnalǵan qarajatty esepteý, tóleý jáne paidalaný máseleleri boiynsha ózgerister men tolyqtyrýlar engizý týraly" Qazaqstan Respýblikasynyń Zańyna qol qoidy", - delingen habarlamada.
Zańnyń mátini baspasózde jariialanady.
Zańǵa sáikes, 2024 jylǵy 1 qańtardan bastap Ulttyq qordyń jyl saiynǵy investitsiialyq kirisiniń 50%-i balalar 18 jasqa tolǵanǵa deiin olardyń arnaiy jinaqtaý shottaryna aýdarylady. Bul aqshany merziminen buryn alýǵa tyiym salynady.
Bala kámeletke tolǵannan keiin shottaǵy aqshasyn baspana satyp alýǵa nemese oqý aqysyn tóleýge jumsai alady. Alaida bala azamattyǵyn ózgertken nemese joǵaltqan jaǵdaida tólem alý quqyǵynan aiyrylady. Ulttyq qordan beriletin qarajatqa salyq salynbaidy.
Esepshottaǵy aqsha dollarmen jinaqtalady. Al tólenetin kezde sol kúngi kýrspen teńgege aýdarylady.
Balalar aqshany maqsatqa sai paidalanýy úshin BJZQ jinalǵan qarajatty ekinshi deńgeili bankte nemese ulttyq poshta operatorynda ashylǵan shotqa jiberedi.
Aita keteri, 18 jasqa tolǵan azamat shotty ózi qalaǵan bankten asha alady. Eger bala 18 jasqa tolǵannan keiin jinalǵan aqshasyn almasa, ol shotta 10 jyl boiy saqtalady. On jyldan keiin de qajet bolmasa, qarjy sol adamnyń zeinetaqy shotyna aýdarylady.
