Ulttyq qordyń aktivteri biylǵy qazannyń sońynda 55,1 mlrd AQSh dollaryn qurady. Bul týraly QR Ulttyq bankiniń tóraǵasy Erbolat Dosaev aitty, dep habarlaidy QazAqparat.
Onyń aitýynsha, qazan aiynda 428 mlrd teńgege nysanaly jáne kepildendirilgen transfertterdi bólýdi qamtamasyz etý úshin 988 mln AQSh dollary satyldy.
«Qazanda Ulttyq qorǵa túsim 103 mlrd teńge, onyń ishinde shetel valiýtasynda 163 mln AQSh dollary boldy. Bul aida Ulttyq qordyń investitsiialyq kirisi naryqty túzetýden keiin qalpyna kelip, tek aktsiialar men altynnyń ósýi esebinen 871 mln. AQSh dollary boldy. Investitsiialyq kiris Ulttyq qor aktivteriniń teńgerimdi allokatsiiasy esebinen jyl basynan beri qalpyna keldi jáne 2 mlrd. AQSh dollary nemese 3,44% boldy», - dedi Dosaev Úkimet otyrysynda.
Sonymen birge, altynvaliýta rezervteri biylǵy qazannyń sońynda 35,8 mlrd AQSh dollaryn qurap, bir aida 307 mln AQSh dollaryna artqan.
«Altyn portfeli altyn baǵasynyń bir ýntsiiasy úshin 1796 AQSh dollaryna deiin 3,8%-ke ósýi esebinen 1,2 mlrd AQSh dollaryna ósti. Erkin konvertatsiialanatyn valiýtadaǵy aktivter negizinen ekinshi deńgeidegi bankterdiń korrespondenttik shottaryndaǵy qaldyqtardyń tómendeýi esebinen 854 mln AQSh dollaryna azaidy. Jalpy halyqaralyq rezervterdiń barlyǵy bir aida 354 mln.AQSh dollaryna ulǵaiyp, 90,9 mlrd AQSh dollaryn qurady», - dep túsindirdi Ulttyq bank tóraǵasy.
