Sybailas jemqorlyqqa qarsy is-qimyl ulttyq biýrosynyń elordalyq departamentimen «KTJ» UK» AQ enshiles kompaniiasy – KTZ Express AQ laýazymdy tulǵalaryna qatysty sotqa deiingi tergeý júrgizilip jatyr.
Bul týraly QR memlekettik qyzmet isteri jáne sybailas jemqorlyqqa qarsy is-qimyl agenttiginiń qoǵammen bailanys departamentiniń direktory Arman Berdalin málimdedi.
«Atalǵan kompaniialardaǵy laýazymdy tulǵalar shetel kompaniiasynyń 1 mlrd teńge kólemindegi debitorlyq qaryzyn zańsyz esepten shyǵarý arqyly ókilettikterin teris paidalanýda kúdikti dep tanylyp otyr. Bul zańmen qorǵalatyn memleket múddesine eleýli ziian alyp kelgen. Ulttyq biýro departamentiniń aralasýynan keiin atalǵan soma qalpyna keltirildi jáne «KTZ Express» AQ shotyna debitorlyq qaryz retinde esepteldi. Tergeý jalǵasýda», - dep aitty Berdalin.
Sondai-aq, Sybailas jemqorlyqqa qarsy is-qimyl ulttyq biýrosymen QR Tsifrlyq damý, qorǵanys jáne aeroǵarysh ónerkásibi ministrligi Qorǵanys memlekettik materialdyq rezervtik komiteti tóraǵasynyń laýazymdyq ókilettigin teris paidalaný faktisi anyqtaldy.
Al «Astana sý arnasy» sharýashylyq júrgizý quqyǵyndaǵy memlekettik kommýnaldyq kásipornynyń burynǵy basshysy JShS paidasyna ofistik jáne jertóle úi-jailaryn berý týraly qosymsha kelisim jasasý jáne turǵyn úi keshenin kásiporyn teńgerimine qabyldaý-tapsyrý aktisine qol qoiý úshin JShS direktorynan turǵyn úi kesheninde 2 páter túrindegi jáne 60 myń AQSh dollary somasyndaǵy para alý faktisimen ustaldy.
Qyzylorda oblysy boiynsha departamentimen Tutynýshylardyń quqyqtaryn qorǵaý departamenti basshysynyń mindetin atqarýshy – oblystyń bas memlekettik sanitariialyq dárigeri qaramaǵyndaǵy aýdandyq bólimsheler basshylarynan 30 myńnan 50 myń teńgege deiingi somada júieli negizde para alǵan.
