QR Mádeniet jáne sport ministri Aqtoty Raiymqulovanyń buiryǵymen «Ulttyq kinony qoldaý ortalyǵy» kommertsiialyq emes aktsionerlik qoǵamynyń basqarma tóraǵasynyń mindetin atqarýshy bolyp Gúlnár Sársenova taǵaiyndaldy, dep habarlaidy "Ult aqparat" ministrlikke silteme jasap.
Gúlnár Bolatqyzy Sársenova - kinoprodiýser, rejisser, stsenarist. 1966 jyly 6 tamyzda Qaraǵandy qalasynda dúniege kelgen. Almaty qalasyndaǵy QazUÝ-dyń jýrnalistika fakýltetin támamdaǵan. Máskeý qalasyndaǵy Búkilodaqtyq memlekettik kinematografiia institýtynyń rejisserlik fakýltetinde bilim alǵan, keiin ataqty SSSR kinorejisseri Tatiana Lioznovanyń tálimgerliginen ótken. AQSh-tyń Feniks qalasyndaǵy ýniversitetterdiń birinde qosymsha kásiptik bilim alǵan. Filosofiia ǵylymdarynyń kandidaty.
2005 jyly «Eurasia Film Production» kinokompaniiasyn qurdy, kompaniia Resei, Amerika jáne Eýropanyń ozyq stýdiialarymen halyqaralyq kinojobalardy birlesip oryndap keledi.
2008 jyly Pýsandaǵy halyqaralyq kinofestivalde «Aziia kinosyndaǵy jyl adamy» syilyǵyna ie boldy.
2005-2008 jyldary Astana qalasyndaǵy «Eýraziia» halyqaralyq kinofestivaliniń uiymdastyrýshysy ári bas direktory, al 2010 jyly Almaty qalasyndaǵy ekinshi Qazaqstan-Amerika kinofestivaliniń bas direktory bolǵan.
Onyń alǵashqy «Mońǵol» atty filmi 2007 jyly Amerika kinematografiia óneriniń akademiiasy usynǵan abyroily «Oskar» syilyǵynyń nominanty atandy.
«Qyzǵaldaq» («Tiýlpan») filmi halyqaralyq kinofestivalderde 32 marapatqa ie bolǵan, onyń ishinde Aýstraliianyń Brisben qalasyndaǵy halyqaralyq festivalde «2008 jyldyń eń úzdi tolyqmetrajdy filmi» sanatynda Aziia-Tynyq muhittyq kinematografiianyń eń negizgi syilyǵy – «Aziia-Tynyq muhittyq Oskar» syilyǵyna ie boldy.
2018 jyly «Aika» filmi Frantsiia, Germaniia, Túrkiia, Japoniia, Gonkong jáne AQSh elderindegi kinosyilyqtyń júldegeri atandy, Frantsiiadaǵy Halyqaralyq Kann festivalinde «Altyn palma butaǵy» degen bas marapatqa ie bolyp, nominant atandy, «Shet tilindegi eń úzdik film» sanaty boiynsha Amerika kinematografiia óneri akademiiasynyń «Oskar» syilyǵynyń qysqa tizimine endi. Sondai-aq Gonkongtaǵy Aziia festivalinde aziialyq «Oskar» syilyǵyn ielendi.
Esterińizge salsaq, osy jyldyń naýryz aiynda Qazaqstan Táýelsizdik alǵaly osy salada qabyldanǵan alǵashqy zańnamalyq qujat - QR «Kinematografiia týraly» zańǵa sáikes Ulttyq kinony qoldaý memlekettik ortalyǵy quryldy.
Bul uiymnyń qyzmetiniń negizgi baǵyty ulttyq kinony qoldaý, ony halyqaralyq deńgeige kóterý jáne álemdik naryqqa shyǵarý, Qazaqstan kinoóndirisine investitsiia tartý. Atalǵan ortalyq arqyly ulttyq filmderge, ulttyq film ataǵyn ielenýge nietti kinojobalarǵa memleket tarapynan qarjylai qoldaý kórsetiledi, sonymen qatar kinematografiia salasynda sýbsidiia beriledi.
