Parlament Májilisiniń jalpy otyrysynda «Kvazimemlekettik sektordyń jekelegen sýbektileriniń satyp alýy týraly» zań jobasy birinshi oqylymda maquldandy, dep habarlaidy "Ult aqparat".
Memleket basshysynyń 2020 jylǵy 1 qyrkúiektegi Joldaýyna sáikes Qarjy ministrligi atalǵan zań jobasyn ázirledi.
«Qazirgi ýaqytta kvazimemlekettik sektordyń satyp alýlary ártúrli normativtik quqyqtyq aktilermen rettelip keledi. Máselen, «Samuryq-Qazyna» qorynyń satyp alýlary «Ulttyq ál-aýqat qory týraly» Zańmen jáne Qordyń direktorlar keńesi bekitken satyp alý qaǵidalarymen retteledi. «Samuryq-Qazyna» qorynyń quramyna kirmeitin «Báiterek», «QazAgro», «Zerde» siiaqty ulttyq kompaniialardyń satyp alýy «Memlekettik múlik týraly» Zańmen jáne Qarjy ministrligi bekitken Satyp alý qaǵidalarymen retteledi.
Ortalyq jáne jergilikti atqarýshy organdardyń janynda jumys isteitin kvazimemlekettik sektor sýbektileriniń satyp alýlary «Memlekettik satyp alý týraly» Zańmen jáne Memlekettik satyp alýdy júzege asyrý qaǵidalarymen retteledi», - dedi Qarjy ministri Erulan Jamaýbaev.
Tegin meditsinalyq kómektiń kepildik berilgen kólemi esebinen dárilik zattardy satyp alatyn meditsinalyq uiymdardyń jáne Biryńǵai distribiýter «SK-Farmatsiia» JShS-niń satyp alýlary Densaýlyq týraly Kodekspen jáne Dárilik zattardy satyp alý qaǵidalarymen retteledi.
«Ázirlengen zań jobasymen Samuryq-Qazyna Qorynyń jáne ózge de ulttyq holdingter men ulttyq kompaniialardyń satyp alýlaryn retteý usynylady. Osylaisha, zań jobasy satyp alýlary shamamen 3,4 trln teńge somasyndaǵy 250-den asa ulttyq kompaniialardy olardyń enshiles uiymdarymen birge qamtityn bolady. Bul rette ortalyq jáne jergilikti atqarýshy organdardyń janyndaǵy memlekettik kásiporyndardyń, aktsionerlik qoǵamdar, jaýapkershiligi shekteýli seriktestikterdiń satyp alýdy «Memlekettik satyp alý týraly» Zańnyń aiasynda qaldyrý usynylady», - dedi ministr.
Zań jobasynda mynadai negizgi tásilder eskerilgen:
Birinshiden, kvazimemlekettik sektor sýbektileri úshin biryńǵai bolyp sanalatyn, Zańnyń qoldaný aiasyna, qaǵidattarǵa, shekteýlerge, tásilderge, baqylaýǵa jáne shaǵymdanýǵa qatysty bazalyq erejeler Zań deńgeiinde bekitiledi.
Ekinshiden, satyp alý protsesin naqtylaityn normalardy erejeler deńgeiinde reglamentteý usynylady. Osy jerde «Samuryq-Qazyna» qorynyń Satyp alý erejelerin bekitýdi ýákiletti organnyń (Qarjymini) kelisimi boiynsha Qordyń qaramaǵynda qaldyrý usynyldy. Bul Qor qyzmetiniń ereksheligi men onyń mártebesine, sondai-aq IRO ótkizý jáne jekeshelendirýdiń ózge de túrleri kezinde Qor kompaniialarynyń investitsiialyq tartymdylyǵyn saqtaý qajettigine bailanysty.
«Jalpy, zań jobasyn qabyldaý – kvazimemlekettik sektor sýbektileriniń satyp alýynyń ashyqtyǵyn, tiimdiligin arttyrýǵa jáne osy saladaǵy sybailas jemqorlyq táýekelderin tómendetýge múmkindik beredi», - dedi Erulan Jamaýbaev.
Sonymen qatar jalpy otyrysta «Qazaqstan Respýblikasynyń keibir zańnamalyq aktilerine kvazimemlekettik sektordyń jekelegen sýbektileriniń satyp alýy máseleleri boiynsha ózgerister men tolyqtyrýlar engizý týraly» ilespe zań jobasy birinshi oqylymda talqylandy.
