QR Prezidenti janyndaǵy Ulttyq qoǵamdyq senim keńesiniń taǵy bir bastamasy máre syzyǵyna jetti. Prezident tiisti zańǵa qol qoiǵannan keiin qazaqstandyqtar kólik júrgizýshi kýáligin ózimen birge alyp júrýge mindetti bolmaidy, dep habarlaidy "Ult aqparat".
«Búgin Senat Ulttyq qoǵamdyq senim keńesiniń aiasynda Prezidenttiń tapsyrmasymen Ishki ister ministrligi ázirlegen «Qazaqstan Respýblikasynyń keibir zańnamalyq aktilerine jol júrisi máseleleri boiynsha ózgertýler men tolyqtyrýlar engizý týraly» zań jobasyn qabyldady. Atalǵan zańǵa Prezident qol qoiǵannan keiin kólik ielerine ózimen birge tek jeke kýáligin alyp júrse jetkilikti bolady», - dep jazdy QR Prezidentiniń kómekshisi Erlan Qarin Facebook paraqshasynda.
Esterińizge sala ketsek, búgin Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine jol júrisi máseleleri boiynsha ózgerister men tolyqtyrý engizý týraly» Zańy eki oqylymda qaralyp, qabyldanǵan bolatyn.
Zańda Qazaqstan Respýblikasynda berilgen júrgizýshi kýáligi men kólik quralyn tirkeý týraly kýálikti ózimen birge alyp júrýdi talap etetin normany qoldanystaǵy zańnamadan alyp tastaý kózdelgen. Iaǵni avtokólik iesin politsiia toqtatqan kezde, ol jeke kýáligin usynyp, sol jeke kýálikpen politsiia qyzmetkeri planshet arqyly elektrondyq bazada onyń qajetti qujattary boiynsha tekserý júrgize alady.
