Aýyl sharýashylyǵy ministriniń keńesshisi Tóleýtai Raqymbekov Ulttyq qoǵamdyq senim keńesiniń 6-otyrysynda kóterilgen máselelerge qatysty pikir bildirdi, dep habarlaidy QazAqparat.
«Búgin Memleket basshysy Qasym-Jomart Toqaevtyń qatysýymen Ulttyq qoǵamdyq senim keńesiniń 6-otyrysy ótti. Prezident túrli salalardaǵy máselelerge qatysty egjei-tegjeili toqtaldy. Bul turǵyda Ulttyq qoǵamdyq senim keńesiniń osy ýaqytqa deiingi zor úlesi týraly aityldy. Shynymen de Keńes bilik pen azamattyq qoǵam arasynda dialog alańyna ainaldy. Eki jyl ishinde Ulttyq keńes músheleriniń bastamalary boiynsha 90-nan astam normativtik-quqyqtyq akti qabyldanǵan. Sonyń arasynda Zańdar, Prezident Jarlyǵy men Úkimet qaýlylary, ministrlikterdiń buiryqtary qamtylyp otyr. Memleket basshysy reformalardyń basty maqsatyn túsindirdi. Bul rette birqatar mańyzdy bastamalardy kópshilik nazaryna usyndy», - Tóleýtai Raqymbekov.
Osy oraida ol búgin Prezident tarapynan eldi meken ákimderine qatysty mańyzdy usynymdar bolǵanyn jetkizdi.
«Budan bólek, Qasym-Jomart Kemeluly bilim berý salasyndaǵy máselelerge qatysty tapsyrmalar berdi. Bul baǵytta 2025 jyldyń sońyna deiin 1 myń mektep salý týraly tapsyrmasyna toqtaldy. Memleket basshysy turǵyn úi alaptary boi kótergen kezde onymen birge mindetti túrde mektep pen balabaqsha jáne basqa da áleýmettik nysandardyń salynýy airyqsha nazarda bolýy kerek ekenin qadap aitty. Qazirgi qurylys qarqynyn eskersek, bul másele óte ózekti», - dedi Aýyl sharýashylyǵy ministriniń keńesshisi.
Onyń aitýynsha, Ulttyq qoǵamdyq senim keńesiniń otyrysynda tsifrlandyrýǵa bailanysty máseleler nazardan tys qalmady. Prezident aqparattyq bazalardyń arasynda bailanys joq ekenin synǵa aldy. Osynyń saldarynan turǵyndardan mór basylǵan qaǵaz anyqtama qajet etedi. Biyl halyqqa qyzmet kórsetý ortalyqtary osyndai 2 millionnan astam qujat bergen.
«Munymen qosa, Prezident bankterdiń kepil saiasatyn jetildirý jáne baǵalaý qyzmetin retteý máselesine arnaiy toqtaldy. Sonymen qatar, qandastarymyzdyń óz atajurtyna oralý máselesi týraly Elbasy birqatar mańyzdy tarihi sheshim qabyldaǵany belgili. 30 jyl ishinde 1,5 mln-nan astam qazaq Qazaqstanǵan keldi. Bul rette Qasym-Jomart Toqaev Úkimetke Uly kóshtiń bastalýyna jol ashqan datany ataýly kúnder kúntizbesine qosý máselesin qarastyrýdy júktedi», - dedi Tóleýtai Raqymbekov.
«Prezidenttiń taǵy bir mańyzdy tapsyrmasy shekaralas aimaqtardy damytýǵa qatysty bolyp otyr. Óitkeni bul taqyryp ulttyq qaýipsizdikke tikelei bailanysty. Maman retinde bul másele meni de alańdatyp júrgen edi. Ózderińiz bilesizder, shekara boiyndaǵy eldi mekenderden turǵyndar qonys aýdaryp jatyr. Sondyqtan osy máselege qatysty Memleket basshysy Úkimetke shekaralas aimaqtardy damytý jónindegi usynys engizýdi júktedi», - dedi sarapshy.
