Aidos Sarym, Erlan Saiyrov, Talǵat Qaliev, Baǵdat Mýsin, Ainur Sábitova, Andrei Chebotarev, Berik Ábdiǵali, Murat Ábenov, Seidahmet Quttyqadam syndy tanymal qoǵam qairatkerleri jáne Ulttyq qoǵamdyq senim keńesiniń músheleri qazaqstandyqtarǵa arnap úndeý qabyldady. Onda Memleket basshysy jariia etken sharalarǵa qoldaý bildirilgen. Ulttyq keńes músheleri azamattardy halyqtyń áleýmettik turǵyda az qamtylǵan tobyna, ásirese kómek qajet etetinderge qamqorlyq tanytýǵa shaqyrdy, dep habarlaidy QazAqparat.
Ulttyq qoǵamdyq senim keńesiniń músheleri óz úndeýlerinde tótenshe jaǵdai rejimi kezeńinde aýyzbirlik tanytý qajettigin atap ótedi.
«Dúniejúzi tap bolǵan daǵdarysty jaǵdai jahandyq ekonomikalyq keńistikte kúrdelenip bara jatyr. Ǵalam ekonomikasy tereń ári júieli ózgeristerdi bastan keshirýde. Álemdik naryq quldyrap, álemdik valiýtalar soqqy astynda qaldy. Búkil el aitarlyqtai ekonomikalyq qiyndyqtar men problemalarǵa tap bolýda», - delingen úndeýde.
Úndeýde búkil qoǵam ózara kómek, yntymaqtastyq, ortaqtastyq syndy qundylyqtar tóńiregine toptasyp jatqany atap ótiledi. Indet qaýpi aldynda adamdar uiymdasyp, qiyndyqtardy birge eńseredi, májbúrli bolǵanymen asa qajetti shekteýlerge túsinistikpen qaraidy. Ulttyq keńes músheleri de qazaqstandyqtardy dál osyǵan shaqyrady.
«Biz osynaý indetpen jalpyhalyqtyq kúres boiynsha Memleket basshysy Qasym-Jomart Toqaev usynǵan sharalardy jan-jaqty qoldaimyz. Osynaý kúrdeli ári qiyn sátte memleket pen qoǵam, bilik pen azamattar bárimizdiń aldymyzda turǵan syn-tegeýringe qarsy birlik pen yntymaqqa qabiletti ekendigin kórsetýi tiis. Biz halyqtyń áleýmettik turǵyda az qamtylǵan tobyna, ásirese kómek qajet etetinderge qamqorlyq tanytýǵa shaqyramyz. Qart adamdarǵa, eń birinshi kezekte jańa virýs táýekeline ushyraǵandarǵa airyqsha nazar aýdaryp, qamqorlyq tanytýymyz kerek. Dárigerlerge, meditsina qyzmetkerlerine jáne indetpen kúrestiń aldyńǵy shebinde júrgenderge kómektesýge tiispiz», - dep atap ótiledi úndeýde.
Ulttyq keńes músheleriniń paiymynsha, ýaqytsha shekteýlerge túsinistikpen qarap, olardy saqtaý mańyzdy. Sol arqyly ózimizge, otbasymyzǵa jáne tóńiregimizdegilerge qamqorlyq tanytamyz. Tek solai ǵana qazaqstandyqtar óz elin, halqyn jáne árbir otbasyn indetten qorǵai alady. Al memleket óz tarapynan barlyq qajetti sharalardy qolǵa alyp, indettiń aldyn orap áreket etetin bolady.
