Eýraziialyq integratsiia institýtynyń sarapshysy Baýyrjan Serikbaev Ulttyq qoǵamdyq senim keńesi qurylǵaly beri alty aidyń ishinde atqarylǵan jumystardy qorytyndylady, dep habarlaidy QazAqparat.
Eýraziialyq integratsiia institýtynda «Ulttyq qoǵamdyq senim keńesi: taldamalyq zerdeleý» atty saraptamalyq baiandama jasaǵan sarapshy keńes qurylǵaly beri eki basqosý ótkenin eske saldy.
«Osy otyrystar qandai máselelerdi qamtyp, naqty qandai jumystar isteldi? Birinshiden, beibit jiyn ótkizý týraly zań jobasy qazir halyqtyń talqylaýy úshin internetke shyqty. Bul jerde bizdiń kez kelgen azamatymyz zańnyń árbir baby boiynsha oi-pikirlerin aita alady. Zań jobasy Parlamentke shyqpai turyp, qoǵamnyń óz usynystarymen oǵan ózgeris engizýge múmkindigi bar. Ekinshiden partiiany tirkeý úshin 20 myń adamnyń qoly jetkilikti. Ózderińiz biletindei burynǵy talap – 40 myń adam bolǵan edi. Úshinshisi – Qylmystyq kodekstiń 174-babyn (Áleýmettik, ulttyq, rýlyq, násildik, tektik-toptyq nemese dini alaýyzdyqty qozdyrý) qaita qarastyrý. Iaǵni buryn bul bap boiynsha bas bostandyǵynan aiyrýǵa deiingi jaza taǵaiyndalyp kelse, qazir bul jazany ákimshilik jazaǵa aýystyrý protsesi júrip jatyr. Parlamenttik oppozitsiia boiynsha da talqy kóp. Parlamentte mindetti túrde oppozitsiia bolýy kerek, óz oilaryn aitatyn partiialar da Parlamentke kirý kerek degen oń ózgerister bolyp jatyr», - dedi Baýyrjan Serikbaev elordada ótken baiandamanyń tanystyrylymynda.
Sarapshy Ulttyq keńeske qatysty qoǵamda túrli syni paiym-pikirler aitylyp jatqanyn zańdylyq dep qabyldaý kerektigin aitady.
«Biz synnan qashpaýymyz kerek. Olardy tyńdai otyryp, kerisinshe Ulttyq keńestiń jumysyn jetildirip, ony halyq únin bilikke jetkizetin platforma bolatyndai deńgeige alyp shyqqanymyz abzal. Ulttyq keńes – jańadan qurylǵan uiym. Qazirgi tańda onyń otyrystaryn aimaqtarda ótkizýge qatysty usynystar aityldy. Rasynda da, aimaqtarda biz estip, bilmei jatqan problemalar barshylyq. Bir ǵana mysal – Qordai oqiǵasy. Sol sebepti jedel túrde oqiǵa ornyna shyǵyp, máseleni jergilikti jerde talqylasa meniń oiymsha, belgili bir pozitivti ózgerister bolar edi. Sonymen qatar ulttyq keńestiń otyrysyn úsh aida bir márte emes, múmkindiginshe aiyna bir ret ótkizip, Ulttyq keńestiń rólin arttyrý kerek degen oidamyn», - deidi ol.
Sarapshynyń aitýynsha, elimizde «Memlekettik til týraly» jańa zańdy qabyldaý máselesi de ózektiligin arttyryp keledi. Bul zańǵa degen halyq pen qoǵam tarapynan suranys joǵary bolyp otyr.
