Ulttyq qoǵamdyq senim keńesiniń múshesi, sarapshy Marat Shibutov aýyl ákiminiń sailaýyna úmitkerdi irikteý jáne úgit-nasihat júrgizý talaptaryna naqty qandai ózgerister engizilgenin aitty, dep habarlaidy QazAqparat.
«Aleksandr Danilov ekeýmiz kelisip aýyl ákimderin sailaý boiynsha zertteý júrgizgen bolatynbyz. Men ideia aityp, Aleksandr sony iske asyrdy. Zertteýge Prezidenttiń jastar kadrlyq rezerviniń músheleri tartylǵan. Aýyl ákimderiniń sailaýyna kandidat retinde túskenderden, baqylaýshylardan, partiia filialdarynyń basshylarynan, aýdan ákimdiginiń ókilderinen jaýap aldy. Solardyń aýyl ákiminiń sailaýyna bergen baǵasyn negizdeý úshin 5 oblysqa issaparmen bardy. Osy jumystardyń qorytyndysy boiynsha úlken material paida boldy. Aleksandr solardy jinaqtap baiandama jasady da, sonyń negizinde usynystar daiyndadyq», - deidi sarapshy.
Onyń sózinshe, Prezident bular joldaǵan úsh usynysty maquldaǵan.
«Usynystar daiyndaǵan kezde baiandamadan bólek, meniń zertteý jumystaryma Gúlmira Eeleýovanyń zertteýlerine arqa súiedik. Sonyń nátijesinde Prezident biz joldaǵan úsh usynysty maquldady.
Birinshi usynys aýyl ákimdigine úkmetkerlerge qoilatyn talaptyń ishinen joǵary bilimi bar bolý kerek degen kedergini alyp tastaý bolatyn. Onyń ornyna orta-arnaiy dep qaldyrdyq. Óitkeni, aýyldarda bul másele keńinen kezdesedi. Joǵary bilimi barlar aýylda kóp turaqtamaidy. Ondaǵy qolynan is keletinderdiń kóbi orta nemese arnaiy bilim barlar. Gúlmira Eleýovanyń osy usynysy qabyldandy», - deidi Marat Shibutov.
Ulttyq keńes múshesi Prezident sailaý aldyndaǵy úgit-nasihat merzimin uzartý týraly usynysty da oń baǵalaǵanyn aitady.
«10 kún degen óte az. Meniń usynysym osy týraly bolatyn. Áli naqtylanyp jatyr, bálkim 20 nemese 30 kún bolatyn shyǵar. Óitkeni keibir aýyldyq okrýgterdiń quramynda birneshe aýyl bar. Solardyń bárin aralap shyǵý ońai emes.
Sondai-aq, Prezident aýyl ákiminiń sailaýyna túskisi keletinder úshin qurylatyn sailaý qorynyń somasyn saralap belgileý týraly usynysymyzdy qoldady. Qazir bul soma bárine ortaq – 200 myń teńge. Sailaý qorynyń somasy ákimi aýysatyn eldi mekenniń mólsherine qarai belgilenýi kerek. Sebebi eldi meken shaǵyn bolsa, turǵyndarynyń sany 500-1000 adamnan aspasa, úgit-nasihat jumystaryna kóp shyǵyn ketpeidi. Al Almaty oblysyndaǵy Baiserke aýyly siiaqty 25 myń halqy bar aýyldarda 200 myń teńgege eshteńe istei almaisyń. Memleket basshysy osy úsh usynymyzdy maquldady. Endi Prezident Ákimshiligi solardy engizý jumystaryn pysyqtap jatyr», - dedi Ulttyq qoǵamdyq senim keńesiniń múshesi.
