Ulttyq qoǵamdyq senim keńesi jumysynyń eleýli bóligi saiasi reformalardy ázirleý jáne ilgeriletýmen qatar, Prezident usynǵan túrli áleýmettik bastamalardy iske asyrýǵa arnalǵan. Memleket basshysynyń kómekshisi Erlan Qarin Telegram kanalynda osyndai pikir jazdy, habarlaidy QazAqparat.
«Memleket basshysynyń 2020 jylǵy 27 mamyrda Ulttyq keńestiń úshinshi otyrysynda bergen tapsyrmasyn oryndaý aiasynda qańtarda «Bilim týraly» QR Zańyna tórt jáne odan da kóp kámeletke tolmaǵan bala tárbielep otyrǵan otbasynan shyqqan balalar; osy mártebeni keminde 3 jyldan beri ielenip kele jatqan januialar; tolyq emes otbasynan shyqqan balalar; bala kezinen múgedek balalardy tárbielep otyrǵan otbasylardan shyqqan balalar, I, II toptaǵy múgedekterge oqýǵa qabyldaý kvotasyn berýdi kózdeitin norma engizildi», - dep jazdy ol Telegram kanalynda.
Onyń aitýynsha, 2021 jyly alǵash ret azamattardyń úsh jańa áleýmettik sanatyna granttar berilgen.
«QR Bilim jáne ǵylym ministriniń 13 tamyzdaǵy buiryǵy boiynsha memlekettik bilim granttary 50 192 talapkerge, onyń ishinde jetimderge – 386 grant, múgedekterge – 303, kóp balaly otbasylardan shyqqan balalarǵa – 3494, tolyq emes otbasylardan shyqqan balalarǵa – 964, bala kezinen múgedek balalardy tárbielep otyrǵan otbasynan shyqqan balalarǵa, birinshi jáne ekinshi toptaǵy múgedekterge – 354 grant berildi»,- dedi Erlan Qarin.
