QR Ǵylym jáne joǵary bilim ministri Saiasat Nurbek jańa ministrliktiń negizgi jumys baǵyttaryn atady, dep habarlaidy QazAqparat.
Onyń aitýynsha, ǵylym salasyndaǵy negizgi mindetterdi Memleket basshysy Qasym-Jomart Toqaev Almatyǵa sapary kezinde Ulttyq ǵylym akademiiasynda aitqan.
«Birinshisi – Ulttyq ǵylym akademiiasynyń mártebesin qaitarý jáne nyǵaitý, bul jumyspen belsendi ainalysyp jatyrmyz. Tiisti zań jobasy ázirlený ústinde. Ekinshi úlken baǵyt – ýniversitet pen JOO-daǵy ǵylym. Qazir ókinishke qarai, ýniversitet ǵylymy negizgi ǵylym bola almady, irgeli, qoldanbaly ǵylymdy qorektendiretin alańǵa ainalmady. Bul jerde de bar kúsh-jigerimizdi salamyz», - dedi Saiasat Nurbek Úkimet otyrysynan keiin jýrnalisterge bergen suhbatynda.
Sonymen birge, vedomstvo qyzmetiniń taǵy bir mańyzdy baǵyty – ǵylymi-zertteý jáne tájiribelik-konstrýktorlyq ázirlemelerdi nemese qoldanbaly zertteýlerdi qoldaý jáne qarjylandyrý.
«Bul jerde bizdiń ministrlik pysyqtap jatqan birneshe júieli sharalar bar jáne jaqyn arada osynyń barlyǵyn ashyq talqylaityn bolamyz. Biz ózimizdiń ǵylymi qaýymdastyǵymyzdan, negizgi JOO-nyń professorlyq-oqytýshylyq quramynan bazalyq tehnikalyq tapsyrma alamyz», - dedi Saiasat Nurbek.
