Mádeniet jáne sport ministrligi memleket qoldaýymen túsiriletin ulttyq filmderdiń biýdjetin 70 paiyzǵa túsirmekshi, dep habarlaidy QazAqparat.
Mundai talap «Kinematografiia týraly» zańda kórsetilgen. Alaida bul norma jyl saiyn, birtindep oryndalyp jatyr. Vitse-ministr Nurǵisa Dáýeshov redaktsiianyń saýalyna bergen jaýabynda jańa tártiptiń qalai júezege asatynyn aitty.
«Zań aiasynda tuńǵysh ret investorlar men jeke kapitaldy tartý maqsatynda ulttyq filmderdi memlekettik qarjylandyrýdyń jańa modeli engizildi. Eger osy kúnge deiin barlyq filmder 100% memlekettik tarapynan nemese jeke menshik tarapynan qarjylandyrylsa, zań qabyldanǵannan keiin kommertsiialyq jobalar memleket-jeke menshik arasynda ishinara eki taraptan qarjylandyrylýy múmkin. Úsh jyldan keiin filmder shyǵarý boiynsha memlekettik biýdjetke túsetin júkteme 30% tómendelmek», - deidi Nurǵisa Dáýeshov.
Ministrdiń orynbasary óz jaýabynda Ulttyq kinony qoldaý memlekettik ortalyǵy biýdjetten qarjylandyrý úlesin birtindep tómendetý boiynsha jumys istep jatqanyn da aitqan.
«Ótken jyly «Kinematografiia týraly» Zańǵa sáikes qarjylandyrý 80%-dy qurasa, biyl 70%, odan ári memlekettiń qatysý paiyzy tómendeitin bolady», - dep jazady vitse-ministr.
Ol, sondai-aq, kino túsirýge ketken biýdjet shyǵyny qaitarýdy jańa tetigi engizilgenin jetkizdi.
«Kinematografiia týraly» QR Zańy boiynsha film shyǵarýǵa memlekettik qoldaý alǵan jeke jáne zańdy tulǵalar ulttyq filmderdi prokattaý men kórsetýden túsken kiristiń 20%-yn Ulttyq kinony qoldaý memlekettik ortalyǵyna aýdarady. Iaǵni, erejege sáikes, barlyq satylymdardyń 20%-yn Ortalyq alady, qalǵan 80% óndirýshige qalady», - delingen jaýapta.
