Foto: Akorda.kz
Prezident Ulttyq ekonomika ministri Álibek Qýantyrovty qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna elimizdiń biylǵy 10 aidaǵy áleýmettik-ekonomikalyq damýynyń aldyn-ala nátijeleri týraly esep berildi.
Qasym-Jomart Toqaevqa 2023 jyldyń qorytyndysy boiynsha jalpy ishki ónimniń ósimi 5 paiyz kóleminde bolady degen boljam jasalyp otyrǵany jóninde baiandaldy. Birinshi jartyjyldyqta shetelden tartylǵan tikelei investitsiia kólemi 13,3 milliard dollarǵa jetti. Jyldyq infliatsiia 2 ese, iaǵni 10,8 paiyzǵa deiin (aqpan aiynda 21,3 paiyz) tómendedi.
Álibek Qýantyrov jalpy ishki ónimdegi shaǵyn jáne orta biznestiń úlesi 36,4 paiyzǵa jetkenin málimdedi. Bul – rekordtyq kórsetkish. Shaǵyn jáne orta biznes óndirgen ónim kólemi 28 trillion teńgeden asty. Bul salada 4,3 million adam jumyspen qamtylǵan. Biyl 9 myń jobaǵa sýbsidiia berildi. Nesieniń jalpy kólemi – 669 milliard teńge.
Memleket basshysyna biznesti tekserý isin 2 ese azaitý úshin kásipkerlik salasyna jańa retteý saiasaty engiziletini týraly málimet berildi. Mindetti talaptar reestri jasalyp, syn-qaterlerdi basqarý júiesi avtomattandyrylady.
Qasym-Jomart Toqaevqa jańa Biýdjet jáne Salyq kodeksteriniń ázirlený barysy, sondai-aq investitsiialyq saiasat, memlekettik-jekeshelik áriptestikti damytý sharalary týraly aityldy.
Budan bólek, Ulttyq ekonomika ministri «Tarifti investitsiiaǵa aiyrbastaý» baǵdarlamasynyń júzege asyrylýy jóninde baiandady. Atap aitqanda, biyl 267 milliard teńge investitsiia tartý, 5,8 myń shaqyrym jelini jóndeý, turǵyn-úi kommýnaldyq sharýashylyq salasy qyzmetkerleriniń jalaqysyn 50 paiyzǵa kóterý, jelilerdiń tozý deńgeiin 3,2 paiyzǵa azaitý josparlanyp otyr.
Prezidentke Aýyldyq aýmaqtardy damytý tujyrymdamasynyń iske asyrylýy jaiynda málimet berildi. «Aýyl – el besigi» baǵdarlamasy iske qosylǵaly beri respýblikalyq biýdjetten qarjylandyrý kólemi 7 ese artty. Biyl 771 aýylda 1,8 myń jobany oryndaý josparlanyp otyr.
Kezdesý sońynda Qasym-Jomart Toqaev sapaly jáne ornyqty ekonomikalyq ósimdi qamtamasyz etý, sondai-aq reformalardy tiimdi júrgizý jumystaryn jalǵastyrýdy tapsyrdy.
