Parlament Senatynyń jalpy otyrysynda Ulttyq ekonomika ministri Áset Erǵaliev 2021 jylǵa arnalǵan makroekonomikalyq kórsetkishter men biýdjettik parametrlerdi tanystyrdy, dep habarlaidy QazAqparat.
«Makrokórsetkishterdiń boljamy el ekonomikasynyń ósýi boiynsha jedel derekterdi, álemdik ekonomika men naryqtaǵy úrdisterdi eskere otyryp, naqtylandy. Jalpy ishki ónimniń ósý qarqyny qańtar aiyndaǵy minýs 4,5% paiyzdan sáýir aiynyń qorytyndysy boiynsha pliýs 0,7% paiyzǵa deiin jaqsardy. Makrokórsetkishterdi naqtylaý kezinde munaidyń ortasha jyldyq baǵasy barreline 50 dollar deńgeiinde aiqyndaldy. Dúniejúzilik bank pen Halyqaralyq valiýta qorynyń boljamdary boiynsha álemdik ekonomikanyń ósýi osy jyly 4,3% jáne 6 % quraidy. Joǵaryda baiandalǵandardy eskere otyryp, el ekonomikasynyń ósý boljamy 2,8% paiyzdan 3,1% deiin jaqsardy. Osylaisha ekonomikalyq ósim qalpyna kelý satysynda bolady», - dedi ministr.
Bul rette nominaldy jalpy ishki ónim 77,8 trln teńge kóleminde baǵalanýda. Syrtqy suranysty qalpyna keltirý aiasynda metallýrgiiadaǵy óndiristiń neǵurlym belsendi ósý esebinen óńdeýshi ónerkásiptegi boljamdy kórsetkishter 4,1%-dan 5,2% -ǵa deiin jaqsardy.
«Ulttyq banktiń boljamy boiynsha eksport 10,8 mlrd dollarǵa, iaǵni 52,2 mlrd dollarǵa deiin ulǵaiady. Import 37,1 mlrd dollardy quraidy. Infliatsiia buryn bekitilgen 4-6% dálizde saqtaldy. Túzetilgen makroekonomikalyq boljam negizinde 2021 jylǵa arnalǵan respýblikalyq biýdjet parametrleriniń boljamy naqtylandy. Respýblikalyq biýdjettiń kiristeri transfertterdi esepke almaǵanda 2021 jyly 7 trln 204 mlrd teńge kóleminde baǵalanady. Ulttyq qordan kepildendirlgen transfert ózgermeidi jáne 2 trln 700 mlrd teńge mólsherinde saqtaldy. Ulttyq qordan nysanaly transfert 1 trln teńgeden 1 trln 850 mlrd teńgege deiin ulǵaiady. Respýblikalyq biýdjet shyǵystary 15 trln 334 mlrd teńge kóleminde boljanyp otyr. Biýdjet tapshylyǵy jalpy ishki ónimge qatysty 3,5% deńgeiinde boljanyp otyr», - dedi Erǵaliev.
