QR Premer-Ministri Asqar Mamin Úkimet otyrysynda jergilikti ákimdikterge ekonomikanyń barlyq sektorynda ósim qarqynyn ulǵaitýdy tapsyrdy, dep habarlaidy QazAqparat.
«Ulttyq ekonomika kórsetkishteri ornyqty qalpyna keltirý dinamikasyn kórsetýdi jalǵastyryp otyr jáne pandemiia bastalar aldyndaǵy deńgeiine jetti. Segiz aidyń qorytyndysy boiynsha jalpy ishki ónimniń ósýi 3 paiyzǵa deiin jyldamdady. Óńdeýshi ónerkásipte ósý qarqyny 5,8 paiyzǵa, saýda salasy 9,1 paiyzǵa, bailanysta 12,8 paiyz jáne qurylysta 11,4 paiyzǵa kúsheiýde. 8 aida elimizde 8,9 mln sharshy metr úi paidalanýǵa berildi», - dedi Úkimet basshysy.
Onyń aitýynsha, bul byltyrǵy jylmen salystyrǵanda 10,5 paiyzǵa artyq.
«Qyzmetter kórsetý sektoryndaǵy ósý qarqyny qalpyna kelip, 2,3 paiyzǵa jetti. Negizgi kapitalǵa investitsiialar kórsetkishiniń senimdi qalypqa kele bastaǵanyn atap ótý kerek, olar taý-ken óndirý ónerkásibin esepke almaǵanda 18 paiyzǵa ulǵaidy», - degen Premer-Ministr ár óńirdiń 8 aida qol jetkizgen makroekonomikalyq kórsetkishterine toqtaldy.
Aitýynsha, qańtar-tamyz ailarynyń qorytyndysy boiynsha barlyq negizgi 7 makrokórsetkish boiynsha Almaty, Jambyl, Qostanai, Mańǵystaý oblystary men Shymkent qalasynda ósý baiqalyp otyr.
«Negizgi 6 kórsetkish boiynsha segiz óńirde ósim baiqalady. Bul Aqmola, Aqtóbe, Atyraý, Qaraǵandy, Qyzylorda, Pavlodar, Soltústik Qazaqstan oblystary men Nur-Sultan qalasy. 5 kórsetkish boiynsha oń serpin úsh óńirde. Bul - Shyǵys Qazaqstan, Túrkistan oblystary men Almaty qalasy. Eń tómengi kórsetkish Batys Qazaqstan oblysynda. Óńir ákimdikteri ekonomikanyń barlyq sektorlarynda ósim qarqynyn ulǵaitqany jón», - dedi Asqar Mamin.
